زانکۆیا دھۆک دێ ئاھەنگا گەڕا 23 یا دەرچوونا قوتابیان گێڕیت
ئەڤرۆ نیۆز، رێوار مزیری:
ھاریکارێ سەرۆکێ زانکۆیا دھۆک بۆ کاروبارێن قوتابیان بۆ ئەڤرۆ نیۆز دیار کر کو ل ژێر درووشمێ (بەرەف کوردستانەکا ب ھێزتر) زانکۆیا دھۆک دێ ئاھەنگا گەڕا 23 یا دەرچوونا قوتابیان ل رۆژا پێنجشەمبی 20-9-2018ێ ل دەمژێر 5:30 ئێڤاری ل گۆرەپانا یانا دھۆک یا وەرزشی گێڕیت.
د. مێھڤان عارف، ھاریکارێ سەرۆکێ زانکۆیا دھۆک بۆ کاروبارێن قوتابیان ئاشکرا کر کو ئەڤ سالە چار ھزار و 140 قوتابی ژ ھەموو تایبەتمەندیان ژ 17 کۆلیژێن زانکۆیا دھۆک دەرچووینە و دێ پشکداریێ د ئاھەنگا گەڕا 23 یا دەرچوونا قوتابیان دا کەن و گۆت: “پیرۆزباھیێ ل ھەموو قوتابیێن دەرچوویی دکەم و کەسوکارێن ھەموو قوتابیێن دەرچوویی ماف یێ ھەیی ل ڤێ ئاھەنگێ ئامادەببن، چونکی جھێ ئاھەنگ لێ دھێتە گێڕان یێ بەرفرەھە”.
ناڤھاتی ئاماژە دا وێ چەندێ کو قوتابی دشێن رۆبێن دەرچوونێ ھەر ژ سوبەھی رۆژا 17-9-2018ێ ھەمبەر 50 ھزار دیناران ژ زانکۆیێ وەرگرن و ھەر دەمێ قوتابی رۆبە بۆ زانکۆیێ زڤراند دێ 50 ھزار دینارێن داینە زانکۆیێ لێ ھێنە زڤراندن.
