پروفیسور د.وەعدی مزووری: پەرلەمانەکێ بھێز دێ سەروەریا قانوونێ پارێزیت
ئه‌ڤرۆ نيوز:
د دیدارەکا تایبەت دا دگەل رۆژنامەیا ئەڤرۆ، پروفیسور د.وەعدی مزووری گۆت، ل گورەی بەرنامێ کارێ من بۆ پەرلەمانێ کوردستانێ، دێ ھەموو بزاڤا کەم کو پەرلەمان ببیتە مینبەرا دانانا باشترین پروژە ژبۆ ئاڤاکرنا جڤاکەکێ مەدەنی ل سەر بنیاتێ ھندێ کو قانوون سەروەر بیت.
پروفیسور د. وەعدی مزووری بەربژێرێ پارتی دیموکراتی کوردستان ل سەر لیستا 183 ژمارە (78) بۆ ھەلبژارتنێن پەرلەمانێ کوردستانێ، ل دۆر کارێ خوە دەمێ راوێژکار ل نڤێسینگەھا راوێژکارێن سەرۆکاتیا پەرلەمانێ کوردستانێ دبێژیت: گەلەک پروژە من پێشکێشی پەرلەمانی کرینە، ھندەک بوونە قانوون و ھاتینە پەسەندکرن، و ھندەک دن ژی د ڕێ دا، پروفیسوری ئاماژە دا چەندین ژ وان قانوون و بڕیارێن کو ئەوی دانە پەرلەمانی مینا قانوونا راستڤەکرنا قانوونا پارێزەران، دیسا پروژێ راستڤەکرنا قانوونا دادگەھا دستورییا بلند، ھەروەسا پروژێ قانوونا رێکخستنا کارێ راوێژکاران د دام و دەزگایێن حکومەتا ھەرێمێ دا، دیسا پروژێ دانپێدان ب کارەساتا شنگالێ کو ببیتە جینوساید، زێدەباری چەەندین پروژەیێن دیێن گرنگ.
د. وەعدی مزووری بەحسا وێ یەکێ کر کو، ھەکە ھات و ئەو سەرکەفت د ھەلبژارتنان دا دێ ھەموو بزاڤان کەت ژبۆ دەرێخستنا قانوونا چاکسازییێ، چونکو ب دیتنا وی ئەڤە ژ پرۆژێن ھەرە گرنگن کو پێدڤیە پەرلەمان ب ھووری ل سەر راوەستیت و گۆت: (دێ لیستا مە ھەموو بزاڤان کەت ژبۆ بھێزکرنا پێگەھێ ھەرێما کوردستانێ ل سەر ئاستێ عیراقێ و ھەرێمی و نێڤدەولەتی، و ئەڤ یەکە دخازیت کو مە پەرلەمانەکێ ب ھێز و کاریگەر ھەبیت).
سەبارەت پیتەدان ب رەوشا کەس و کارێن شەھید و ئەنفالکریان، وەعدی مزووری ھەلگرێ باوەرناما دکتورایێ د یاسایێ دا دبێژیت: لیستا (183) یا پارتی دیموکراتی کوردستان پیتەکا ھەرە مەزن دایە ئەڤێ تەخێ، چونکو ب خوینا شەھیدان نھا ئەم ئازاد و سەرفەراز دژین، لەوما وەکو بەرنامێ مە بۆ خوڵا داھاتی یا پەرلەمانێ کوردستانێ، دێ بەردەوامیێ دەینە خزمەتکرنا خێزانێن شەھید و ئەنفالکریان، و دێ پرۆژێن باشتر ژبۆ خوەشکرنا ژیانا وان ھێنە بلندکرن.
د بەردەوامیا ئاخفتنێن خوە دا د.وەعدی کاندیدێ ژمارە (78) ئەو ژی ئاشکراکر کو، ژ وان پروژێن کو ئەو دێ پیتە پێ دەت ل پەرلەمانی، باشترلێکرنا مووچەیێ پێشمەرگەی و ھێزێن نافخۆیە، چونکو ئەڤەنە ئاخ و کەرامەت و ئێمناھیا کوردستانێ پاراستیە وھەتا نھا دپارێزن و گۆت: (ئەم دێ پرەوژەکێ باش ل دۆر دابینکرنا گەرنتیا ساخلەمی یە پێشکێشی پەرلەمانی کەین، دیسا دێ قانوونێن کارێگەر ھەبن ژبۆ نەھێلانا بێ کاریێ ژی).
ل دووماھیێ پروفیسوری دیارکر کو، ژبەر کو کوردستان دەڤەرەکا بەرنیاسە ب گەشت وگوزاریێ، ئەو دێ پیتەکا ھەری مەزن دڤی باری دا دەن، دیسا ژ ئالیێ کشتوکال و سامانێن سرۆشتی ژی ڤە، دێ پروژێن باش ھەبن ژبۆ رێکخستنا کارێ ڤان کەرتان و ژ ئالیەکێ دی ڤە ژی گۆت: (من پروژەکێ باش ھەیە ژبۆ کێمکرنا دیاردا قەیرەژنیێ ل کوردستانێ).
