دلین عەبدلکەریم: پارتی دڤێ خولێ دا دێ خزمەتکا مەزن بۆ مللەتی کەت
ئەڤرۆ، شەھلا رێکانی:
ئەندازیار دلین عەبدلکەریم زاخویی، بەربژارا ژمارە 7 ل سەر لیستا 183 یا پارتی دیموکراتی کوردستان ل سنورێ لقێ ھەشت یا پارتی ل زاخو، بەرنامێ کارێ خوە بۆ رۆژناما ئەڤرۆ دیار کر و گۆت: (ھەکە من باوەریا وەلاتیێن کوردستانێ ب دەستڤە ئینا و بۆمە پەرلەمانتار، من چەندین بەرنامە و پلان ھەنە، بەلێ بەرنامێ من یێ ھەرە گرنگ دێ یێ گرێدایی بیت ب راستڤەکرن و دروستکرنا یاسایێن گرێدایی ب ئاسانکرنا ژیانا خێزانێن شەھیدا و پێشمەرگێن قارەمان، ژبەرکو ئەون ئەگەرێ ڤێ ئێمناھیا ئەم تێدا دژین و ئەڤ ئێمناھیە ھەموو بەرھەمێ خوینا شەھیدا و ھشیاربوونا پێشمەرگێن قارەمانە، لدووڤدا دێ کار ل سەر پلانێن خوە یێن گرێدایی کەرتێ پەروەردێ و ئاڤەدانیێ کەم).
بەربژارا ژمارە (7) یا پارتی گۆت: (ئەز پشتراستم کو د ڤێ خولێ دا دێ پارتی خزمەتەکا زور مەزن بو خەلکی کەتن، چونکی سەرەرای ھەموو وان قەیران و نەخۆشیێن ل سەر ڤی مللەتی دا دھێن، خەلک ھەر وەفادارن بۆ پارتی دیموکراتی کوردستان، لەورا خەلک ژ ھەژی خزمەتەکا مەزنتر و باشترە بو بھێتە کرن).
دلین عەبدلکەریم بەربژارا پارتی دیموکراتی کوردستان بۆ پەرلەمانێ کوردستانێ گۆت: (ئەز سوزێ ددەم و سووند دخوم ب ئاخا کوردستانێ و خوینا شەھیدا، چ جارا خیانەتێ ل وێ باوەریا خەلکی دایە من نەکەم و دێ دەمەکێ خوە تەرخان کەم بۆ سەرەدانێن مالێن شەھید و پشمەرگە و کێم دەرامەت و کێم ئەنداما و ھەموو تەخ و چینێن کورد، ژ زاخو ھەتا دووماھیک خالا کوردستانێ).
ئەندازیار دلین عەبدلکەریم ئەو چەندە ژی گۆت: (ئەز خەلکێ خوە پشتراست دکەم کو بێ خەمساری دێ راوەستم ل سەر ھەموو پروژێن پێشکێش دکەم و سوزێ ددەم کار بکەم بێ راوەستیان ھەتا بگەھمە ئارمانجا خوە ئەوا د بەرژەوەندیا خەلکی دا) .
ل دووماھیێ بەربژارا پارتی دیموکراتی کوردستان بۆ پەرلەمانێ کوردستانێ گۆت: (داخوازێ ژ خەلکێ کوردستانێ دکەم ل روژا دەنگدانێ بچنە سەر سندوقێن دەنگدانێ و دەنگێ خوە بدەنە لیستا 183 یا پارتی دیموکراتی کوردستان، و ل سەر کاغەزا دەنگدانێ بیرا خوە بیننە ھەموو وان نەخۆشیێن ب سەرێ مللەتێ مە ھاتین و کا کێ ل وی دەمی و ھەتا نھا مافێن مە پاراستینە و بزانن ئەو ئێمناھیا ئەم تێدا دژین ھەموو بەرھەمێ پارتی دیموکراتی کوردستانە ژ بو ئاڤاکرنا کوردستانەکا بھێز).
