ڤيديۆ: وه‌لاتيه‌ك ماران ل مالا خوه ب خودان دكه‌ت
ئەڤرۆ نیوز، نەوزاد ھلۆری:
وەلاتیەکێ ناحیا قەسروک یا سەر ب قەزا شێخان رابویە ب خودانکرنا زێدەتری 34 زور یا مارا د مالا خوە دا ، وەکو ئەو ددەت دیارکرن ئەڤە زێدتری 30 سالایە ئەو مار و پشیک و بالندەیان ل گەل مروڤان دمال دا ب خودان دکەت بێی کو ئێک ژ وان زیانێ بگەھینیت یێ دی.
عەبدولسەلام ئەمین ئەو وەلاتیە بو ئەڤرۆ نیوز دبێژیت: (خودانکرنا مارا دمال دا ل گەل مروڤ و پشیک و بالندەیان تشتەک نورمال نینە و شارەزایی و جورعەت پێدڤێت، و ھەموو کەس نەشێن بکەن ، و ئەز ھەر جھێ ماری ببینم ئێکسەر دگرم بێی کو ژێ بترسم و نوکە دمال دا من زێدەتری 34 مارا ھەنە و ئەز مارا ل گەل پشیک و بالندەیان ب خودان دکەم).
زێدەتر گۆت: (خوارنا سەرەکی یا ئەز ددەم مارا گوشت و شیر و ئاڤ و شەکرە ، و ئەگەر مرۆڤ چ زیانێ نەگەھینیت ماری ، مار چوو زیانان ناگەھینیت مروڤان ، و رەنگە مار و پشیک ، و مار و بالندە و جورێن ماران ل گەل ھەڤدوو ، و مار ل گەل مروڤان دوژمن بن بەلێ د مالا من دا ھەموو ھەڤالن و چوو ژ وان زیانێ ناگەھینیت یێ دی).
عەبدولسەلامی د درێژاھیا ئاخفتنێن خودا دیارکر ژی کو ئەڤە ئەوی ل مالا خودا مار ب خودانکری ھەتا نوکە زێدەتری ھزار کەسان دناڤخوە و دەرڤەیێ کوردستانێ سەرەدانا وی کریە و گۆت ژی: (ئەز جوداھیێ دناڤبەرا مروڤ و مارا ناکەم ، و ھەرکەسێ بیروباوەری ھەبیت دشێت ل گەل ھەر تشتەکێ ب تایبەتی بژیت، و ھەتا مرنێ ئەز دێ د مالا خوە دا مارا ب خودان کەم).
