ئێكه‌م ناحیه یه ل سه‌ر ئاستێ پارێزگه‌ها دهۆكێ نه‌فتا سپى ل سه‌ر بهێته دابه‌شكرن
ئه‌ڤرۆ نیوز، زنار تۆڤى:
ل شه‌مبیا بهێت دێ نه‌فتا سپى ل سه‌ر وه‌لاتیێن ناحیا كانى ماسێ یا سه‌ر ب قه‌زا ئامێدیێ ڤه هێته دابه‌شكرن، ناحیا کانی ماسێ ژ 78 گوندان پێک دهێت و نوکە 51 گوند د ئاڤانە.
سه‌ربه‌ست سه‌برى ئاكره‌یى رێڤه‌به‌رێ ناحیا كانى ماسێ بۆ مالپه‌رێ ئه‌ڤرۆ نیوز دیاركر: كو ل شه‌مبیا بهێت 13/10/ 2018 دێ نه‌فتا سپى ل سه‌ر وه‌لاتیێن ناحیا كانى ماسێ هێته دابه‌شكرن، ئه‌ڤه دێ بیته ئێكه‌مین ناحى ل سه‌ر ئاستێ پارێزگه‌ها دهۆكێ كو نه‌فتا سپى ل سه‌ر بهێته دابه‌شكرن، هه‌روه‌سا بهایێ هه‌ر به‌رمیله‌كێ نه‌فتێ” 45″ هزار دینارن و هه‌ر خێزانه‌ك دێ “200” لیترێن نه‌فتا سپى وه‌رگریت.
ناڤهاتى زێدەتر گۆت ژى: نوكه ل ناحیا كانى ماسێ 1532 سه‌رۆك خێزان دژین و ئه‌و خێزان هه‌موو دێ به‌هرا خوه یا نه‌فتا سپى ل رۆژا شه‌مبیێ وه‌رگرن، هه‌روه‌سا ژ ئه‌گه‌رێ سه‌قایێ كانى ماسێ یێ سار و به‌فر و بارانى بوویه ئێكه‌م ناحیه كو نه‌فتا سپى لێ بهێته دابه‌شكرن، دیسا ئه‌ڤ چه‌نده هات ژ پێخه‌مه‌ت دیاردا داربرینێ ل ڤێ ده‌ڤه‌رێ نه‌مینیت، له‌وما مه له‌ز تێداكر كو نه‌فت بهێته دابه‌شكرن، ژ پێخه‌مه‌ت ئێدى زیان نه‌گه‌هیته ژینگه‌ها كانى ماسێ و خه‌لك داران نه‌برن.
