ئه‌مريكا ل به‌ره بريارا ده‌سته‌سه‌ركرنا سه‌ركرده‌كێ مه‌زن يێ حه‌شدا شه‌عبى ده‌ربكه‌ت
ئه‌ڤرۆنيوز:
كه‌ناله‌كێ ته‌له‌ڤزيۆنى يێ ئهمريكى ژزارده‌ڤێ ژێده‌ره‌كێ نێزيك ژ باليۆزخانا ئهمريكى ل به‌غدا، به‌لاڤكر كو ئه‌مريكا ل به‌ره بريارا ده‌سته‌سه‌ركرنا ئيك ژ سه‌ركردێن حه‌شدا شه‌عبى ده‌ربكه‌ت.
كه‌نالى (سكاى نيوز) يێ ئهمريكى به‌لاڤكر” ل دووڤ وان پێزانينێن گه‌هشتين، ئه‌مريكا دێ( ئه‌بو مه‌هدى موهه‌ندس) جێگرێ سه‌رۆكێ ده‌سته‌يا حه‌شدا شه‌عبى ئێخيته دناڤ ليستا داخوازكريێن نێڤده‌وله‌تى.
ئه‌بو مه‌هدى موهه‌ندى ب وێ چه‌ندێ يێ تۆمه‌تباره كو سامانێ گشتى يێ عيراقێ بكارئينايه بۆ مه‌ره‌مێن تايبه‌ت يێن خوه و100 هزار كه‌س ل ناڤ ميليشيێن حه‌شدا شه‌عبى دامه‌زراندينه بێ كو وان كه‌سان چوئه‌وه‌ليات هه‌بن وب پراكتيكى دكارى دابن، هه‌روه‌سا زێده‌تر ژ 3 مليار دۆلارێن ئهمريكى ب ناڤێ خوه هنارتينه ئيرانێ.
وى كه‌نالى دياركر ژى كو هژماره‌كا په‌رله‌مانتارێن عيراقى ئاگه‌هدارى دؤسيا گه‌نده‌ليێن ئه‌بو مه‌هدى موهه‌ندسن، به‌لێ ژبه‌ر ترسا ل سه‌ر گيانێ خوه، نه‌وێرن وان گه‌نده‌ليان ئاشكرا بكه‌ن.
دهێته زانين ئه‌وبو مه‌هدى موهه‌ندس ئێك ژ سه‌ركردێن ديار يێن حه‌شدا شه‌عبى يه كو ل گه‌ل هژماره‌كا دى يا كه‌سايه‌تيێن شيعى يێن عيراقى يێن دژى رژێما به‌عس بۆ ده‌مێ چه‌ندين سالان ل ئيرانێ بووينه ول بن فه‌رمانا له‌شكرێ پاسداران وفه‌رمانا فه‌رماندێن وى له‌شكرى وب تايبه‌تى له‌شكرێ قودس، وان له‌شكرێ به‌در دامه‌زراند وپه‌يوه‌نديه‌كا كوور ل گه‌ل ئيرانێ يا هه‌ى وژ روويێ هزرى وئايديولۆژى ڤه پابه‌ندى ئيرانێ يه وفه‌رمانان ژ قاسم سلێمانى وفه‌رماندێن دى يێ له‌شكري پاسداران وه‌ردگريت ول ده‌مێ داگيركرنا كه‌ركووكێ وده‌ڤه‌رين كوردستانى يێن ده‌رڤه‌ى ئيدارا هه‌رێما كوردستانێ، ئه‌و ئێك ژ دارێژه‌رێن وێ پيلانێ بوو ب هاريكاريا له‌شكرێ قودس ووى ب خوه ژى راسته‌وخوه پشكدارى دوان هێرشان دا دكر.
