پارتى دێ ئه‌ڤرۆ سه‌ره‌دانا ئێكه‌تى و گۆڕان كه‌ت
ئه‌ڤرۆ نیوز:
ژڤانه ئه‌ڤرۆ 17-11-2018 پارتی دیموكراتی كوردستان خودانا 45 كورسیێن په‌رله‌مانی ده‌ست ب دانوستاندنێن پێكئینانا كابینا نه‌هێ یا حوكمه‌تا هه‌رێما كوردستانێ ل گه‌ل ئالیێن سیاسی بكه‌ت.
دوهى رۆژا ئه‌ینی 16-11-2018 كه‌نالێ KNN زمان حالێ ته‌ڤه‌گه‌ڕا گوڕان ئاشكرا كر كو سوباهی رۆژا شه‌مبی، دێ دانوستاندن ل سه‌ر پێكئینانا كابینا نوو یا حوكمه‌تێ ل باژێرێ سلێمانیێ ده‌ست پێ كه‌ن، ژڤانه شانده‌كێ بلندێ پارتی ل سه‌ر ئاستێ مه‌كته‌با سیاسی سه‌ره‌دانا باژێرێ سلێمانیێ بكه‌ت.
هه‌ر د هه‌مان راگه‌هاندن دا هاتیه كو شاندێ پارتی دێ ب سه‌رۆكاتیا ئازاد به‌رواری بیت ئه‌ندامێ مه‌كته‌با سیاسی یا پارتی دیموكراتی كوردستان، دێ سه‌ردانا هه‌ر ئێك ژ ته‌ڤگه‌ڕا گۆڕان و ئێكه‌تیا نشتیمانی یا كوردستانێ كه‌ت.
پێشتر عه‌لى حه‌مه سالح، سه‌رۆكێ فراكسيۆنا گۆڕان ل په‌رله‌مانێ كوردستانێ د داخۆيانيه‌كێ دا بۆ ئه‌ڤرۆ نيوز ئاشكه‌را كربوو كو هێشتا وان چو بڕيار ل دۆر پشكداريكرن يان نه‌كرن د حوكمه‌تێ دا نه‌داينه و گۆت: “د كۆمبوونا جڤاتا نشتيمانى دا ئه‌ڤ بڕياره دێ هێته دان”.
ژ لايه‌كێ دى ڤه بێگه‌رد ته‌له‌بانى، ئه‌نداما سه‌ركرداتيا ئێكه‌تيێ و به‌ربژارا وێ پارتيێ بۆ سه‌رۆكاتيا په‌رله‌مانێ كوردستانێ د داخۆيانيه‌كێ دا راگه‌هاند كو ئێكه‌تى دێ پشكداريێ د حوكمه‌تێ دا كه‌ت و هه‌ر ئێك ژ پۆستێن سه‌رۆكێ په‌رله‌مانى و جێگرێ سه‌رۆك وه‌زيران مافێ وانه و گۆت: “ب چو ره‌نگه‌كى ل گه‌ل هه‌بوونا دو جێگرا نينين بۆ سه‌رۆك وه‌زيران”.
ئه‌ڤه د ده‌مه‌كى دايه كو پێشتر چه‌ندين كه‌ساتيێن ناڤدارێن ناڤا پارتى ژ سه‌ركرداتيێ و سه‌ر ئاستێن كێمتر ژى پێداگريێ ل سه‌ر وێ چه‌ندێ دكه‌ن كو بۆ ڤێ جارێ پێدڤيه پارتى ب گۆره‌يى كورسيێن په‌رله‌مانى سه‌ره‌ده‌ريێ ل گه‌ل لايه‌نێن سياسى بكه‌ت.