ل باکور بەرەیەکێ نەتەوەی بۆ ھەلبژارتنان دھێتە ئاڤاکرن
ئەڤرۆ نیۆز، ھۆشەنگ تاجر:
بایرام بۆزیەل جێگرێ سەرۆکێ گشتی یێ پارتا سوسیالیست یا باکورێ کوردستانێ بۆ ئەڤرۆ نیۆز دیار کر کو د ھەلبژارتنێن ٢٤ خزیرانێ دا مە ٥ پارتێن کوردی ل باکور دڤیا ل گەل ھەدەپێ بەرەیەکێ بۆ ھەلبژارتنان ئاڤا بکەین، لێ مخابن ھەدەپێ داخوازیێن مە رەت کرن و ژ بەر ھندێ ژی ئەم نھا ژ بۆ ھەلبژارتنێن باژێرڤانیان یێن کو دێ ل ٣١ ئادارا سالا ٢٠١٩ برێڤە چن خوە بەرھەڤ دکەین.
جێگرێ سەرۆکێ گشتی یێ پارتا سوسیالیست ل باکورێ کوردستانێ ئەو یەک ژی دیار کر نھا ئەم و پارتا ئازادی ل گەل چەندین پارتێن دی یێن کوردی ژ بلی ھەدەپێ د ناڤا دانوستاندنان داینە و مە دڤێت بەرەیەکێ نەتەوی بۆ ھەلبژارتنان دروست بکەین و گۆت: (ئارمانجا مە ئەڤە کو ھێزەکا نوو و نەتەوی یا کوردی ل تورکیا و باکورێ کوردستانێ ب دەنگ و رەنگێن کوردی پشکداریێ د ھەلبژارتنان دا بکەت و ئەم ھێڤیدارین بشێین ببینە ئەگەرێ دەستپێکرنا قۆناغەکا نوو یا سیاسی ل تورکیا و باکورێ کوردستانێ).