یاسایا زێده‌گاڤیێن ئه‌ردى ب درۆستى ناهێته بجهئینان
ئه‌ڤرۆنیوز، ئه‌میر ئه‌ترووشى:
ل سالا 2002 یاسایا ژماره پێنچ هاتبوو ده‌رخستن و ب رێیا وێ یاسایێ بریار هاتبوو دان زێده‌گاڤیێن به‌رى سالا 2000 هه‌مى بهێنه تاپۆكرن، لێ ئه‌ڤ یاسایه هه‌تا نوكه وه‌كو پێدڤى ل دهۆكێ نه‌هاتیه بجهئینان.
ئدریس هه‌ركى، سه‌رۆكێ لیژنا یاسایى ل ئه‌نجوومه‌نێ پارێزگه‌ها دهۆكێ بۆ ئه‌ڤرۆنیوز دیار كر، ل پارێزگه‌ها دهۆكێ هژماره‌كا مه‌زن یا زێده‌گاڤیێن ئه‌ردى و خانیان ژلایێ وه‌لاتیان ڤه هاتینه كرن و هه‌ر قه‌زایه‌كا پارێزگه‌ها دهۆكێ پتر ژ سێ هزار زێده‌گاڤیان لێ هاتینه تۆماركرن و گۆت: ل گۆره‌ى قانوونا ژماره پێنچ یا سالا 2002، هه‌ر وه‌لاتیه‌كێ زێده‌گاڤى كربیت و كاغه‌زا ژماره پێنچ هه‌بیت كو به‌رى سالا 2000 خانیێ خۆ ئاڤاكربیت، دێ خانیێ وى هێته تاپۆكرن.
ناڤبرى ئاماژه دا وێ چه‌ندێ، هژماره‌كا وان خانیێن زێده‌ڤاكى هه‌تا نوكه هاتینه تۆماركرن، به‌لێ وه‌كو پێدڤى ئه‌ڤ قانوونه نه‌هاتیه بجهئینان و گه‌له‌ك خانى ماینه هێشتا نه‌هاتینه تاپۆكرن و گۆت ژى: قه‌زا دهۆكێ و زاخۆ پتر ژ هه‌مى قه‌زایێن دى زێده‌گاڤى لێ هاتینه تۆماركرن.