پشتی قەرەبووکرنێ ٢٠ خێزان ماینە د ناڤ ئاڤاھیێن گۆزاری یێن ئامێدیێ دا
ئەڤرۆ نیوز، مەحمود نھێلی
سەرۆکێ باژێرڤانیا قەزا ئامێدیێ بۆ ئەڤرۆ نیوز دیار کر کو ھژمارەکا کێم یا زێدەگاڤیان ل سنوورێ باژێرڤانیا وان ھاتینە تۆمارکرن و گۆت: “سەرەرایی ڤێ چەندێ نێزیکی ٢٠ خێزانان پشتی ھاتینە قەرەبووکرن ماینە د ناڤ ئاڤاھیێن گۆزاری یێن قەزا ئامێدیێ دا”.
ئەندازیار رەمەزان حەجی عەساف، سەرۆکێ باژێرڤانیا قەزا ئامێدیێ دیار کر کو ل سنوورێ باژێرڤانیا وان بتنێ سێ زێدەگاڤی ل سەر مولکێ گشتی ھاتینە کرن و گۆت: “ئەڤ ھەر سێ زێدەگاڤی یە ئەون یێن خانی ل سنوورێ باژێرڤانیێ دروستکرین و ئەو جە نە یێ ئاکنجیبوونێ یە و وان ئەو خانی بێ رازیبوونا باژێرڤانیێ یێن چێکرین کو ئێک ژوان ل سالێن نوتان ھاتیە چێکرن و یێن دی ژی یێن پشتی سالا ٢٠٠٠ێ نە”.
ناڤھاتی ئاماژە دا وێ چەندێ کو ل کومەلگەھا سکە یا گۆزاری پشتی سەرھەلدانێ ھژمارەکا خێزانان لێ ئاکنجی ببوون و ئەڤ خێزانە ھاتنە قەرەبووکرن، لێ نوکە پتر ژ ٢٠ خێزانان ماینە و نەدەرکەفتینە یان ژی کورەکێ وان مایە تێدا و نەھاتیە قەربووکرن کو ئەڤە ژی دبیتە ئاریشەک و ھەتا نوکە چارەسەر نەبوویە و گۆت: “بەری نوکە ھژمارەکا مەزن یا خێزانان د ئاڤاھیێن کومەلگەھا کوانێ دا یا سەر ب قەزا ئامێدیێ ڤە ژی ئاکنجی ببوون و پشتی ھاتینە قەرەبووکرن ھندەک ژ وان دەرکەفتن و ھندەک ژی ھەتا نوکە د ناڤ وان ئاڤاھیان دا دژین، لێ ئەم نەشێن وان وەکو زێدەگاڤی ل سەر مولکێ حوکمەتێ ب ھژمێرین”.
