دەست ب پاقژکرنا گرێ قائیدا ژ مین و تەقەمەنیان ھاتەکرن
ئەڤرۆ نیوز، نەوزاد ھلۆری:
ب مەرەما نەھێلانا مین و تەقەمەنیان، رێڤەبەریا گشتی یا کاروبارێن مین و تەقەمەنیان ل پارێزگەھا دھۆک دەست ب پاقژکرنا گرێ قائیدا ل دێرەلووکێ کر کو پتری 52 ھزار مەترێن چوار گوشەیە.
مەسعود مەلا شەفیق، رێڤەبەرێ گشتیێ کاروبارێن مین و تەقەمەنیان بۆ ئەڤرۆ نیوز گۆت: (ب مەرەما نەھێلان و پاقژکرنا مین و تەقەمەنیان ل سنوورێ دەڤەرا ئامێدیێ و ناحیا دێرەلووک ب تایبەتی، تیم و کەمپەک بو راکرنا مین و تەقەمەنیان ل ئامێدێ ھاتیە دانان، نوکە ئەوێ تیمێ دەست ب راکرن و نەھێلانا مین و تەقەمەنیان کر ل گرێ قائیدا ل دێرەلووک).
زێدەتر گۆت: (رووبەرێ ئەوی گری دبیتە پتری 52 ھزار مەترێن چوارگوشە، ھەر چەندە دڤیا زوتر دەست پێ کربایە، بەلێ ژ ئەگەرێ بارینا بارانێن بەردەوام و نەدانانا فەرمانبەر و کارمەندێن گرێبەستێن نوو راکرنا وان ژی گیروبوو، بەلێ تیم نوکە ب شێوەیەکێ بەردەوام دەست بکاربوو و تا نوکە سێ پارچە تەقەمەنی ھاتینە دیتن، دەستپێکێ ژی ل رەخێ گوندێ گەلەکا دەست پێ کر ژبەرکو خەلکێ وی گندی گلەی دکرن چونکی گیانەورێن وان دچنە دەردورێن گری و پێشتر ژی چەند گیانەوەر و تەرش و کەوالێ وان بویە قوربانی و ھاتینە کوشتن).
ناڤبری دیارکر ژی کو پشتی داوی ھاتنا گرێ قایدا ئەو دێ چاڤەرێ بن کو کوژمەکێ پارەی ژلایێ گەشەپێدانا پارێزگەھا دھۆک بھێـە تەرخانکرن بو تیم و کەمپا وان داکو بشێن ل گەلێ بالندا و جھێن دن ژی مین و تەقەمەنیان راکەن و نەھێلن.