دەخلودانێ جۆتیارێن کوردێن دەڤەرا شنگالێ دھێتە سۆتن
ئەڤرۆ نیوز:
ئەندامەکێ جڤاتا قەزا شنگالێ دیار کر، ئاگرەکێ مەزن بەربوویە دەخلودانێ جۆتیارێن کورد یێن دەڤەرا شنگالێ و دبێژیت: ھەتا نوکە ئەگەرێن روودانێن سۆتنا دەخلودانێ جۆتیارێن کورد نەھاتیە زانین.
خەلیل حەسەن، ئەندامێ جڤاتا قەزا شنگالێ ئاشکرا کر، ئەڤرۆ ١٠/٦/٢٠١٩ ئاگر بەربوویە دەخلودانێ جۆتیارێن کورد د ناڤبەرا بەعاج و قەزا شنگالێ دا و بۆ (باسنیوز) گۆت: “د ڤێ روودانا ئاگربەربوونێ دا، رووبەرەکێ مەزنێ دەخلودانێ دیسا ھاتە سۆتن و ئەگەرێن ڤان روودانان ژی ھەتا نوکە ئاشکرا نینن، ھەر کەسەک تشتەکی دبێژت، لێ ئەڤ سالە مەزنترین رووبەرێ دەخلودانێ جۆتیارێن کورد ل شنگالێ ھاتیە سۆتن”.
وی ئەندامێ جڤاتا قەزا شنگالێ ئاماژە ب وێ چەندێ ژی کر کو د شەڤترا بۆری ژی دا دو جاران ئاگر بەربوویە دەخلودانێ جۆتیاران ل نێزیک تەلەعفەر، دیسا دوھی ژی ئاگرەکێ مەزن بەربوویە دەخلودانێ جۆتیاران د ناڤبەرا بەعاج و شنگالێ دا و پتریا وی ئەردی ژی یێ جۆتیارێن کوردە.
