کۆنگرێ میزوبوتامیا ب پشکداریا نۆشدارێن ھەر چار پارچێن کوردستانێ دێ ل دھۆکێ ھێتە گێڕان
ئەڤرۆ نیوز، لەزگین جوقی:
رێکخەرێ کۆنگرێ میزوبوتامیا یێ ھەشتێ ل پارێزگەھا دھۆکێ دیار کر کو کۆنگرێ ھەشتێ یێ میزوبوتامیا ل دھۆکێ دێ ھێتە گێران و نۆشدارێن ھەر چار پارچێن کوردستانی َدێ تێدا پشکدار بن.
د. عەبدوللا جاسم، رێکخەرێ کونگرێ میزوبوتامیا یێ ھەشتێ ل پارێزگەھا دھۆکێ بۆ ئەڤرۆ نیوز دیار کر کو د ناڤ کونگرەی دا دێ چەندین پێزانین و سەربورێن نۆشداری دناڤبەرا نۆشدارێن ھەر چار پارچێن کوردستانێ دا لێک ھێنە گۆھارتن بۆ خزمەتا گەل و وەلاتێ مە و گۆت: “کونگرێ ھەشتێ دێ ب زمانێ کوردی ھێتە ئەنجامدان، مەرەم ئەوە ژی لێکگۆھارتنا زانستێ پێشکەفتی یێ نۆشداری یە ب زمانێ کوردی بھێتە بەحسکرن، ئەڤە چەندین کونگرە ھاتنە ئەنجامدان و مفایەکێ مەزن گەھشتیە نۆشداران د بوارێ نۆشداریا نوو دا ئەڤ سالە ژی ساخلەمیا پارێزگەھا دھۆکێ دگەل زانکۆیا دھۆک دێ ڤی کۆنگرەی ل دھۆکێ ئەنجام دەت و بەرھەڤیێن مەزن بۆ ڤێ چەندێ ھاتینەکرن”.
ناڤھاتی ئاماژە دا وێ چەندێ کو ل رۆژا ٢٢/٦/٢٠١٩ ل ھۆلا کونفرانسان زانکۆیا دھۆک دێ رێورەسمێن ئەنجامدانا کۆنگرێ ساخلەمیێ یێ میزوبوتامیا یێ ھەشتێ دەست پێ کەن و نۆشدارێن باکوور و باشوور و رۆژھەلات و رۆژئاڤا ھەر سال ل پارچەکا کوردستانێ ڤی کۆنفرانسی دگێرن و گۆت: “٢٠ نۆشدار ژ ئورۆپا و ھەتا ١٨ نۆشداران ژی ژ رۆژئاڤایێ کوردستانێ د ڤی کۆنگرەی دا بەرھەڤ بن دگەل نۆشدارێن رۆژھەلات و باکوورێ کوردستانێ دێ پێشکداربن، ھەتا نوکە پێنج کۆنگرە ل وەلاتێ تورکیا ھاتینە گێران و ئێک ژی ل سلێمانیی و ئێک ژی ل دھۆکێ ھاتیە گێڕان، ئەڤ سالە ژی دھۆک بۆ گێڕانا ڤی کۆنگرەی ھاتیە ھەلبژارتن، نوکە بەرھەڤیێن مەزن بۆ ئەنجامدانا کونگرەی دەستپێکرینە”.
