ھەڤپەیمان دخوازن ھێزێن پێشمەرگەی بۆ دەڤەرێن کوردستانی بھێنە ڤەگەڕاندن
ئەڤرۆ نیوز، قائید میرۆ:
بەرپرسەکێ وەزارەتا پێشمەرگەی ئاشکرا کر کو پڕۆسا چاکسازیا وەزارەتا پێشمەرگەی یا بەردەوامە و گۆت: “ھەڤپەیمانێن نێڤدەولەتی د بەردەوامن ل سەر ھەڤکاریێن خوە بۆ ھێزێن پێشمەرگەی و خواستیە پێشمەرگە بۆ لێدانا تیرۆرستێن داعش ڤەگەڕنە دەڤەڕێن کوردستانی”.
عەمید ھەژار عومەر، بەرپرسێ پەیوەندیێن وەزارەتا پێشمەرگەی بۆ ئەڤرۆ نیوز دیار کر کو ھەماھەنگیا تەمام دناڤبەرا وەزارەتا پێشمەرگەی و ھێزێن ھەڤپەیمان دا ھەیە ھەم بۆ مەشق و راھێنانێ ب ھێزێن پێشمەرگەی ھەم ژی بۆ لێدانا گرۆپێ تیرۆرستێن داعش، بەردەوام ھەڤپەیمان داخواز دکەن ھێزێن پێشمەرگەی بھێنە ڤەگەڕاندن بۆ دەڤەرێن کوردستانی یێن دەرڤەی ئیدارا حوکمەتا ھەرێما کوردستانێ و گۆت: “مەرەم ژ ڤەگەڕیانا پێشمەرگەی ژی ئەوە گورزێن کوژەک ل تیرۆرستێن داعش بدەن ل ئەوان دەڤەران، ژ بەر کو لڤینێن داعشێ ل زۆربەیا دەڤەرێن عیراقێ زێدەبووینە”.
ناڤھاتی ئاماژە دا وێ چەندێ کو ھەڤپەیمانێن نێڤدەولەتی د بەردەوامن ل سەر ھەڤکاریێن خوە بۆ ریفۆرم و چاکسازیێ د ناڤا ھێزێن پێشمەرگەی دا، یا کو بەری نوکە ھاتیە دەستپێکرن و بڕیارە ل گورەی پڕۆژێ وەزارەتێ چاکسازیەکا تەمام د ھەموو بیاڤان دا بھێتەکرن و گۆت: “وەزارەت یا بەردەوامە ل سەر بزاڤێن خوە بۆ چاکسازی و رێکخستنا ھێزێن پێشمەرگەی، بێگومان دێ بەردەوام ژی بیت ھەتا ھەموو خالێن د ناڤ پڕۆژەی دا وەکی خوە دھێنە بجە ئینان”.
