بڕیارەکا نوو ل دۆر پیڤەرێن ئاڤێ ھاتەدان
ئەڤرۆ نیوز:
وەزارەتا باژێڕڤانیان و گەشت و گۆزارێ ل حوکمەتا ھەرێما کوردستانێ بڕیار دا سزایێ گرێ نەدانا پیڤەرێن ئاڤێ بۆ دەمێ دو ھەیڤێن دی بھێتە پاشخستن، بەرپرسەکێ وەزارەتێ ژی دبێژیت: ئەڤ بڕیارە ب تنێ بۆ جارەکێ یە و دەم ناھێتە درێژکرنڤە.
وەزارەتا باژێڕڤانیان و گەشت و گۆزارێ ل حوکمەتا ھەرێما کوردستانێ ئەڤرۆ ٢/٧/٢٠١٩ بڕیار دا سزادانا وەلاتیێن ھەرێما کوردستانێ ژ ئەگەرێ گرێ نەدانا پیڤەرێن ئاڤێ ژ ٢/٧/٢٠١٩ بۆ ١/٩/٢٠١٩ بھێتە درێژکرن، لێ ھەتا وی دەمی؛ ھەر وەلاتیەکێ پیڤەرێ ئاڤێ گرێ نەدەت، ب کۆژمێ ٢٠٠ ھزار دیناران دێ ھێتە سزادان.
مەسعود کاڕەش، رێڤەبەرێ گشتی یێ ئاڤ و ئاڤڕێژان ل وەزارەتا باژێڕڤانیان و گەشت و گۆزارێ یا حوکمەتا ھەرێمێ بۆ دواڕۆژ گۆت: “ئەڤ بڕیارە د بەڕژەوەندیا وەلاتیان دا ھاتیەدان و بۆ ھندێ یە کو ئێدی چو کەسەکی بەھانا ھندێ نەمینیت کو پیڤەرێ ئاڤێ گری َنەدەت”.
رێڤەبەرێ گشتی یێ ئاڤ و ئاڤڕێژان ل وەزارەتا باژێڕڤانیان و گەشت و گۆزارێ گۆتژی: “بەری نوکە، بڕیار ئەوبوو؛ ھەر وەلاتیەکێ ھەتا ٢/٧/٢٠١٩ پیڤەرێ ئاڤێ گرێ نەدابا، ب کۆژمێ ١٠٠ ھزار دیناران دا ھێتە سزادان، بەلێ نوکە ئەو دەمە ھاتە درێژکرن، لێ ب مەرجەکی، ھەکە ھەتا ١/٩/٢٠١٩ ھەر وەلاتیەکێ پیڤەرێ ئاڤێ گرێ نەدەت، ب ٢٠٠ ھزار دیناران دێ ھێتە سزادان”.
وەکو دیار؛ ئەڤە دەمێ چار سالایە وەزارەتا باژێڕڤانیان و گەشت و گۆزارێ ل حوکمەتا ھەرێما کوردستانێ، ب رێیا کەرتێ تایبەت دەست ب گرێدانا پیڤەرێن ئاڤێ بۆ مالان کری و ھەتا نوکە ٧٥% ژ وەلاتیان ئەو پیڤەرە گرێدایە.