ل كومه‌لگه‌هه‌كا قه‌زا ئامێدیێ پێنج قوتابخانه ب ناڤه‌كێ نه
ئه‌ڤرۆ نیوز، نه‌وزاد هلۆرى:
كومه‌لگه‌ها سیریێ ئێكه ژ كومه‌لگه‌هێن سه‌ر ب ناحیا شێلادزێ و هژماره‌كا قوتابخانان ژلایێ حوكمه‌تا هه‌رێما كوردستانێ هاتینه ئاڤاكرن، به‌لێ پێنج ژ وان قوتابخانان ب ناڤه‌كێ هاتینه بناڤكرن، ماموستایه‌كى ژى د ده‌ت دیاركرن كو پێدڤىیه ناڤێن وان بۆ هنده‌ك ناڤێن دن بهێنه گوهرین.
ئه‌سعه‌د رێكانى، ماموستا ل كومه‌لگه‌ها سیریێ بۆ ئه‌ڤرۆ نیوز گۆت: (ل كومه‌لگه‌ها سیریێ پێنج قوتابخانه ب ناڤه‌كێ هاتینه ئاڤاكرن كو ئه‌ڤ یه‌ك ژى شاشیه‌كه و پێدڤىیه هه‌ر قوتابخانه بناڤه‌كێ بیت، داكو بۆ قوتابیان و ماموستا و خه‌لكى ژى یا روون و دیاربیت).
زێده‌تر گۆت: (هه‌ر ئێك ژ قوتابخانێن ئاماده‌یا سیریێ یا تێكه‌ل، قوتابخانا سیریێ یا كه‌ڤن یا بنه‌ره‌ت، قوتابخانا سیریێ یا بنه‌ره‌ت، ئاماده‌یا سیریێ یا ئێڤاران و قوتابخانا سیریێ یا ئێڤاران بناڤێ سیریێ هاتینه بناڤكرن، له‌ورا ئه‌م پێشنیار دكه‌ین بۆ رێڤه‌به‌ریا په‌روه‌ردا ئامێدیێ كو ناڤێن وان قوتابخانان بگوهۆریت).
ناڤبرى دیاركر ژى كو ئه‌و قوتابخانه بناڤێن كه‌سان دهێنه نیاسین نه‌ك قوتابخانێ و زێده‌تر گۆت: (هه‌كه ماموستا یان قوتابیه‌كێ یان ژى كه‌سه‌كى كاره‌ك ل وان قوتابخانا هه‌بیت، دڤێت بێژیت قوتابخانا فلان كه‌سى هه‌كه ناهێته نیاسین).
