پێشنيازا دامه‌زراندنا رێڤه‌به‌ريه‌كا گشتى يا نوو ل پارێزگه‌ها دهۆكێ دهێته كرن
ئه‌ڤرۆ نيوز:
لژنا دارايى ل په‌رله‌مانێ كوردستانێ د كۆمبوونا خوه يا ئه‌ڤرۆ سێشه‌مبى 3/9/2019 داخوازا دامه‌زراندنا رێڤه‌به‌ريا گشتى يا ديوانا چاڤێريا دارايى ل پارێزگه‌ها دهۆكێ كريه.
مالپه‌رێ په‌رله‌مانێ كوردستانێ به‌لاڤكر” ئه‌ڤرۆ سێشه‌مبى لژنا دارايى ب سه‌رپه‌رشتيا هيڤيدار ئه‌حمه‌د جێگرێ سه‌رۆكێ لژنا دارايى كۆمبوو كو چه‌ندين پرس تێدا هاتنه به‌حسكرن”.
د ته‌وه‌رێ سيێ دا يێ كۆمبوونا لژنا ناڤبرى هاتيه” پێدڤيه له‌ز بهێته كرن د ڤه‌كرنا رێڤه‌به‌ريا گشتى يا چاڤدێريا دارايى ل پارێزگه‌هێن (دهۆك و هه‌له‌بجه) كه هه‌تا نوكو ل وان هه‌ردو پارێزگه‌هان نينه، هه‌روه‌سا ل پارێزگه‌ها سلێمانيێ كو دو رێڤه‌به‌ريێن گشتى هه‌نه بهێنه رێكخستن”.
هيڤيدار ئه‌حمه‌د، ئه‌ندامێ په‌رله‌مانێ كوردستانێ ژ فراكسيۆنا پارتى ديموكراتى كوردستان د به‌رپه‌رێ خوه يێ فيسبووكى دا ل دۆر داخوازا ڤه‌كرنا رێڤه‌به‌ريا گشتى يا چاڤدێريا دارايى ل پارێزگه‌ها دهۆكێ دبێژيت” رۆلێ وێ رێڤه‌به‌ريێ دووڤچوونا خه‌رجى و وه‌سلێن هه‌موو داموده‌زگه‌هێن سه‌ر ب پارێزگه‌ها دهۆكێ يه كو رێگرى ژ هه‌ده‌ردانا مالێ گشتى بهێته كرن و رێ ل هەموو وان کەسان بگرن یێ ب کەیفا خوە ملکێ دەوڵەتێ بۆ بەرژەوەندییا خوە و زەنگین بوونا خوە بکار دئینن”.