پاسپۆرتا عيراقى دێ هێته گوهۆڕين
ئه‌ڤرۆ نيوز، نيوار محه‌مه‌د سه‌ليم:
بڕياره پاسپۆرتا عيراقى بهێته گوهۆڕين و ب گۆره‌ى وان گوهۆڕينێن نوو ئێدى پێدڤى ب مۆرێ نابن ژ به‌ر هه‌بوونا سيمكارتى تێدا.
عه‌ميد دلدار نورى، رێڤه‌به‌رێ پاسپۆرتان ل پارێزگه‌ها دهۆكێ د داخۆيانيه‌كێ دا بۆ ئه‌ڤرۆ نيوز ئاشكه‌را كر كو ئه‌وان پێزانين ل سه‌ر وێ چه‌ندێ هه‌نه كو پاسپۆرت دێ هێنه گوهۆڕين، به‌لێ هێشتا چو نڤيسارێن فه‌رمى نه‌گه‌هشتينه ده‌ستێ وان.
عه‌ميد دلدار گۆت: “ب گۆره‌ى پێزانينێن وان گوهۆڕينا پاسپۆرتان دێ ب ره‌نگه‌كى بيت كو سيمكارته‌ك ل سه‌ر په‌رێ وێ يێ ده‌ستپێكى بيت و ئه‌و سيمكارت دێ هه‌موو پێزانين تێدا بن و خواندنا سه‌روچاڤان ژى كه‌ت و ئێدى پێدڤى ب مۆرێ نابن”.
ب گۆره‌ى ئه‌و پێزانينێن ل به‌ر ده‌ستێ ئه‌ڤرۆ نيوز دێ وێنه وه‌كو هێما بۆ پارێزگه‌هان ل سه‌ر پاسپۆرتان هێنه دانان كو هه‌ر وێنه‌ك ده‌ربڕينێ ژ پارێزگه‌هه‌كێ بكه‌ت، د ڤێ ده‌ربارێ دا رێڤه‌به‌رێ پاسپۆرتان گۆت: “چو پێزانينێن ژ ڤى ره‌نگى نه‌گه‌هشتينه مه”.
