سالا 2020 دێ دەستپێکەکا روون بیت بۆ ئایندێ کوردستانێ
ئەڤرۆ نیوز ، زنار تۆڤی:
مەسعود چەلکی چاڤدێر و شرۆڤەکارێ سیاسی یە، بۆ ئەڤرۆ نیوز دیار کر: راستە ئەم وەکو مللەت و وەڵات ڤێکڕا ب سەدان سالە دهێنە ئێشاندن و قڕکرن و ژنافبرن و ژ بێ بەختیا خوە کەفتینە د سێگوشا مرنێ دا کو تەڕو هشک دناڤ دا دسوژن، د دیرووکا سەدان ساڵێت بوری دا وەکی دهێتە زانین و پڕانیا مە شارەزایی و ئاگەهی ژێ هەیە، کو سێ جەمسەر و سێ ئایدولوجیا و سێ نەتەوێت جودا و سێ فەرهەنگ و کولتورێت ژێکجودا و سێ ئیمبراتوریەت و هێزێت زەبەلاحێت جودا و سێ هەڤدژێت مەزن، ل رۆژهەڵاتا ناڤین یێن هەین و هەبوونا خوە یا فەرز و موحکەمکری و یابوویە واقعەکێ خوەڕسک، دیسان فورس، تورک، عەرەب، ئانکو ئیمبراتوریەتا سەفەوی
و ئیمبراتوریەتا ئوسمانی، دەولەتا ئیسلاما عەرەبی و کورد و کوردستان یێت دڤێ سێکوژیێ ڕا ئاسێ و خوەجهبین و دڤێ سێگوشا مرنێدا وەکی ( بەرمودا ) یێ یە.
ناڤهاتی گۆت ژی: ئەم باش دزانین و بابەتەکێ زانستیە کو ئاڤ و ڕوین ناچن ناڤئێک، چنکی هەم پێکهاتێت وان یێت کیمیایی و هەمژی چڕی و سالوخەتێت وان وەکی ئێک نین و پێنەڤێت سروشتیە کو چ ژوان ساڵوخەتێت خوە بەرزە ناکەت، لەوما ب سەدان ساڵ تێکەلی ئێک نابن، ئانکو هەمان نموونا زانستی بۆ مە ژی و لسەر مەژی چێدبت و دسەلمیت، کەس ژڤان هەرسێ توخم و ڕەگەزێت مە گووتین ساڵوخەتێت وان و پێکهاتێت وان نێزیک و وە یێت مە نینن هەڵبەت ئەم نەشێین تێکەل ببین و ئەم ژی بەرنادەین و وەکی وان نابین هەڵبەت ئەوژی مە قەبوول ناکەن و ئاوێتە نابین.
هێشتا دبێژیت: هەڤڕکیێت وان بخوە ل گەل ئێکودو ژ بەر گەلەک ئەگەر و سەدەما دکەڤنار و ڕیشەیی نە و چ جار ب دوماهی ناهێن و پێدڤیە ئەم ڤێ باش بزانین و بدەهان جەنگ و لێکدانێت مەزن و وێرانکەر یێت کرین بکێشەو بەردن و هەر یێت ماین و دێ مینن، ئەم وەکو کورد و کوردستان چ جارا نەبینە پشکەک ژڤێ هەڤڕکیێ و هەفکێشی لێ ئەم چجارا نەشیاینە و نەشێین ژێ ڤەدەرو بێ بەهر بمینین و ڕاستیا وێژی ئەوە بتنێ زەرەرو وێرانی و کاڤلکرن و قڕبین بەهرو پشکا مەبین و لسەر ئاخ و خوینا مە بین بڕبەزانکا وان و بحوکمێ سروشت و جوگرافیا و لاوازیێ.
چەلکی گۆت ژی: کورد بخوە ژی دابەش بینە ل سەر پێگەهێت وان و کەتینە ل گەل هێز و هەفکێشێت وان و بۆخوە بکار ئیناینە و شەر و داستانێت خوە بخوینا کوردا کرینە و ئەو کرینە بەرانێ خێر و سەدەقا، یا ڕاست ئەڤە ناهێت وێ تام و ڕامانێ کو کورد خائین و خوەفروش بووینە یان ژی ساویلکە و چ نەزان بووینە ئان ژی چ هزرمەند و ڕێبەر و زانا نەبووینە ، نەخێر وەسانینە بەلکو کورد بتەنا سەرێ خوە ئەو هێزو قەبارە نەبینە کو بشێن وەکو پێدڤی بەڕەڤانیێ ژ ئاخ و مللەتێت خوە بکن و لایەنەکێ پاڵپشت و هاریکار نەبیە کو پشتا کوردا بێت گرتن چنکو ئەم د ئاسێ و حشارداینە و بێ جیران و هەفسوی بین بتنێ هەر ئەو بین و پێنەڤێت دونیاژی وەکی نوکە بەردای و بەرسفک نەبیە ب ئینترنێت و تەکنولەجیاو فڕوکە و مەتارو پاپوڕو دەریایێت ڤەکری بت ،،، چەک و ئامیرێ هەری پێشکەفتی هەسپ و پێڕهبین ڤێجا ب هزارا کیلومەترا دێ ب هەسپا کیڤە چێ ئان چ بەرژەوەندیا هەفپشک دێ ئێکی لگەل تە هەبت ژ کیشوەرەکێ دیتر ب هزاران کیلەمەترا دوور و لپشت دوژمنێت تە.
وی چاڤدێری گۆت ژی: د دسەرڤێ ڕا کوردا خوە ژی نەدا دەست و ئاخ و کولتور و وەڵاتێ خوە ژی نەدا دەست بەلکو ل وێستگەهێت جودا جودا بزاڤێت لەشکەری سیاسی ڕوشەنبیری چاندی کولتوری جڤاکی هەر هەبین و پێداگری و داکوکی لسەر ئازادی و هەبوینا خوە یا کری و ب دەهان شوڕەش و سەرهلدان یێت هەین و بەرپاکرین لێ هەرزوی یێت هاتین ژنافبرن و قڕکرن ژ ئالیێ ڤان زلهێزا ڤە، ئەڤرۆکە و هەتا ئەڤرۆکە هەمان دەست و دارە و هەمان تاس و حەمامە هەر ئەو یێت هەین و هەرسێ ب هێزن و هێزێت زەبەلاحن و مەکانەت و هەبینا وان یا زاڵ و فەرزە و دەستێ وان ژی گەلەک ب دەستهەڵات ترە ژ ساڵ و چەرخێت بەرێ و هەڤڕکی و بەرژەوەندی و ناکوکیێت وان یێت ئیستراتیجی مەزنتر و کوورترن و یێت دابەش بین لسەر جەمسەر و گروپێت هەری مەزنێت دونیایێ و پشتەڤانی لێ تێت کرن و باش یێت تێکەلی ئێک بین ب بەرژەوەندیێت خوە ئو ئەم کورد و کوردستانی ژی هەر دچاڤێت وان دا ئەو کەلەخێ غەریبین و دوژمنین بۆ وان هێشتا ژمە تێرو حەمەر نەبینە و مە بۆ خوە وەو نێچیرو وەلیمە دبینن بۆ هەر دەرفەتەکا ڕەخسای دسەر هندێ ڕا کو مە چ حەول و قوەت نینە بەرامبەری وان و بەراوردیا هێزێ نائێت کرن.
ئەو ژی ئاشکرا کر: فەرە ئەم شانازیێ بخوە و ب ڕابردووێ خوە و ب ئیرادەو ب هێزا خوە ببین کو ب سەدان ساڵە ب سێقولی و بهێزو پلانێت زەبەلاح کار لسەر نەمانا مە تێت کرن و ئەڤرووکە کوردا هەبینا خوە ئیسبات کرو کوردستان و وەڵاتێ خوە نیشا هەمی دونیایێ دا و مەزلومیەتا خوە دیارکرو یا رژدە و یا پێداگیریێ ل سەر ماف و هەبوونا خوە بهێز دکەت، بێمنەتی و هەڤڕکیێت دیار و بهێز ل گەل ڤان زلهێز و جەمسەرا چ بەرژەوەندی و دروستی بۆ مە تێدا نینە و بتنێ تڤێت ئەم پێکولێ بکین جارێ خوە بپارێزین و ڕێزێت خوە ڕێک بێخین و ئێکبگرین و شەڕ و هەڤڕکی دڤێ مەیدانێ دا بۆ مە دەست نادت و خوەشبەختانە ڤێگاڤێ ئەو بخوە یێت ماین پێکڤە و ئێدی کورد و کوردستان بۆ وان نەمانە کێشەکا گەلەک مەزن و سەر.
