به‌په‌له: خۆپێشاندانێك دژ به شاسوار عه‌بدولواحید به‌ڕێوه‌ده‌چێت داوای ده‌ستگیركردنی ده‌كه‌ن
ئه‌ڤرۆ نیۆز، عه‌زیز هه‌ورامی:
خاوه‌ن پشكه‌كانی چاڤی لاند ئه‌مڕۆ له باخی گشتی سلێمانی كۆده‌بنه‌وه بڕیار له باره‌ی ئه‌نجامدانی خۆپێشاندانی فراوان ده‌كه‌ن، له ڕۆژانی ئاینده و مه‌ترسیی هه‌یه شاسوار چاڤی لاند له بری قه‌رزه‌كانی بیدات به حكوومه‌ت.
حكوومه‌تی هه‌رێمی كوردستان وه‌زیری دارایی ڕاسپاردووه ده‌ستبكات به وه‌رگرتنه‌وه‌ی قه‌رزه‌كانی له سه‌رمایه‌داران و شاسوار عه‌بدولواحید به‌و زیاده‌ی چووه‌ته سه‌ر قه‌رزه‌كه‌ی سه‌ری نیزیكه‌ی 100 مالیار دیناری حكوومه‌ت قه‌رزاره.
دانا محه‌ممه‌د پارێزه‌ری ڕاوێژكار و پارێزه‌ری خاوه‌ن پشكه‌كانی چاڤیلاند به ئه‌ڤرۆ نیۆزی ڕای گه‌یاند، ئه‌مڕۆ 3/6/2020 له باخی گشتی سلێمانی خاوه‌ن پشكه‌كانی چاڤی لاند كۆده‌بنه‌وه و قسه له‌سه‌ر ئه‌نجامدانی خۆپێشاندانێكی گه‌وره‌ده‌كه‌ین و دژ به‌هه‌نگاوه‌كانی شاسوارعه‌بدولواحید كه ده‌یه‌وێت چاڤی لاند له بری قه‌رزه‌كانی بداته به‌حكوومه‌ت و پشكی 10 هه‌زار هاوڵاتی بخوات.
هه‌روه‌ها گوتی:” له خۆپێشاندانه‌كه‌مان داوای ده‌ستگیركردنی شاسوار عه‌بدولواحید ده‌كه‌ین و داوا ده‌كه‌ین شاسوار ده‌سه‌ڵاتی نه‌بێت چاڤی لاند له‌بری قه‌رزه‌كانی بدات به‌حكوومه‌ت ،ده‌بێت موڵكه‌كانی تری لێ وه‌ربگیردرێت.
ئاماژه‌ی به‌وه‌شكرد:” داوا له حكوومه‌ت و په‌رله‌مان و پارێزگاری سلێمانی ده‌كه‌ین مافه‌كانمان له شاسوار عه‌بدولواحید بۆ وه‌ربگرێته‌وه، چونكه چه‌ندین ساڵه مافی 10 هه‌زار هاوڵاتی خواردووه گاڵته به ئه‌قڵی ئه‌و خه‌ڵكه ده‌كات و ئاماده‌نییه هیچ بڕه پاره‌یه‌كی قاجانزیان پێ بدات و ئێستاش پلانی هه‌یه به‌یه‌كجاره‌كی له ژێرناوی دانه‌وه‌ی له بری قه‌رز به‌ته‌واوه‌تی پاره‌كانمان بخوات.
هه‌روه‌ها ئاماژه‌ی به‌وه‌كرد:” ئێمه ساڵانه له دادگا سكاڵا دژی شاسوار عه‌بدولواحید تۆمارده‌كه‌ین داوای مافه‌كانمان ده‌كه‌ینه‌وه به‌ڵام دادگا هیچ ڕێكارێكی یاسایی ناگرێته‌به‌ر دژی.
