HDP: دخوازین ل گەل پارتێن کورد ل باکور ھەڤپەیمانیەکی دروست بکەین

ئه‌ڤرۆ نيوز:
پارتێن کورد یێن باکورێ کوردستانێ بۆ ئاڤاکرنا ھەڤپەیمانیەکا بەرفرەە بۆ ھەلبژارتنێن پەرلەمانێ تورکیا دەست ب ھەڤدیتنان کرینە و سازیێن سڤیل و گەلێ کورد ژی داخواز ژ ھەموو ئالیێن سیاسی یێن کوردی دکەن کو ھێزا خوە بکەنە یەک و ب رێژەکا مەزن ل پەرلەمانێ تورکیا نوونەراتیا گەلێ کوردستانێ بکەن.

مەرال دانش جێگرا ھەڤسەرۆکێ پارتا دیمۆکراسیا گەلان HDP د داخۆیانیەکی دا بۆ رۆژناما ئەڤرۆ راگەھاند کو ترسا وان ژ بەندێ ١٠% یێ ھەلبژارتنێن پەرلەمانێ نینە و گۆت: (ل دووڤ ڤەکۆلین و راپرسیێن کۆمپانیێن تایبەت یێن راپرسیێ دەنگێ پارتا مە گەھشتیە ١١% و رۆژ ب رۆژ ژی زێدەتر دبیت، لێ دیسان ژی ئەم دخوازین ھەم ل گەل سازیێن سڤیل و ھەم ژی ل گەل ھەموو پارتێن سیاسی یێن باکورێ کوردستانێ ھەڤدیتنان بکەین و بگەھنە ھەڤپەیمانیەکا بەرفرەە دا کو سەرکەڤتنا گەلێ کورد مەزنتر بکەین و د ڤان رۆژێن بھێت دا ئەم دێ سەرەدانا ھەموو پارتێن کوردی بکەین).

جێگرا ھەڤسەرۆکا HDP ھەروەسا دیار ژی کر کو وان بریارا خوە یا دووماھیێ داینە کو وەک پارتی پشکداریێ د ھەلبژارتنان دا بکەن و گۆت: (ئەم ژ ھێزا خوە و گەلێ کورد و ئالیێن دیمۆکراسیخوازێن تورکیا باوەرن و چو ترسا مە ژ بەندێ ١٠% نینە و ئەم دێ ب سەرکەڤتنا خوە بەندێ ژ ١٠% یێ ھەلبژارتنان ژی دەرباز بکەین و ھژمارا کورسیێن خوە ل پەرلەمانێ تورکیا گەلەک زێدەتر بکەین).

د پشکەکا دی یا ئاخڤتنا خوە دا ژی مەرال دانش دیار کر ئەو دێ ل گەل پلاتفۆرما دیمۆکراسیا کورد، پارتا ماف و ئازادیان، ژی د ناڤ دا ل گەل ھەموو پارت و ئالیێن سیاسی، کۆمەلە و سازیێن جڤاکێ سڤیل ھەڤدیتنان بکەن و گۆت: (ئارمانجا مە ئەڤە ئەم نەھێلین یەک دەنگەکی گەلێ کورد ژی ڤالا بچیت و ھەموو دەنگ و رەنگێن د ناڤا گەلێ کورد د یەک بنگەھی دا کۆم بکەین و ئەز باوەر دکەم ئەم دێ بگەھینە ئەنجامێن گەلەک ئەرەنی).

مەرال دانش د ئاخڤتنا خوە دا ئەو یەک ژی راگەھاند کو ل باژێرێن تورکیا ژی ئەو دێ بەربژێرێن خوە دەستنیشان بکەن و ل گەل رێکخستن و سازیێن سڤیل و ئالیێن دیمۆکراتیک و چەپ ژی ھەڤدیتنان بکەن دا کو ئەو ژی د ناڤا بەرەیێ دیمۆکراسیێ دا جھێ خوە بگرن و گۆت: (ھژمارا کورسیێن پەرلەمانێ تورکیا ٥٥٠ نە و ئەم دێ ٥٥٠ بەربژێران دەستنیشان بکەین و ئەڤ دەمەکە درێژە مە ل ھەموو باژێرێن تورکیا ژی دەست ب خەباتەکا بەرفرەە کریە و ئەز باوەر دکەم ب وەرگرتنا دەنگێ ئالیگرێن دیمۆکراسیخواز و ئاشتیخوازیێن تورکیا ب رەنگەکی گەلەک باش دێ بەندێ ١٠% دەرباز بکەین و ھژمارا کورسیێن خوە گەلەک زێدە بکەین).

جێگرا ھەڤسەرۆکێ HDP د بەردەوامیا ئاخڤتنا خوە دا ژی راگەھاند کو ھەلویستێ حوکمەتا تورکیا د بابەتێ ھەلبژارتنان دا ب تەمامی دوورە ژ قۆناغا ئاشتیێ و چارەکرنا پرسا کوردی و گۆت: (حوکمەتا تورکیا دخوازیت ل ژێر سیبەرا قانوونێن کۆدەتایا سالا ١٩٨٠ تەمەنێ خوە درێژ بکەت و ژ بەر وێ چەندێ ژ ناخوازیت گوھۆرینان د قانوونێن ھەلبژارتنان دا بکەت و ئەڤ ھەلویستێ وێ یێ دوور ژ دیمۆکراسیێ د ھەمان دەمێ دا قۆناعا ئاشتیێ ژی دخیتە مەترسیێ و ھەموو رێیێن نە رەوا ب کار دھینیت دا کو ل دەستھەلاتێ بمینیت و ھژمارا کورسیێن خوە بگەھینتە وێ ئاستێ کو دستووری ل دووڤ دلێ خوە ب گوھۆریت، لێ ڤێجارێ حسابێ پارتا داد و گەشەپێدان (ئاکپارتی) سەر ناکەڤیت و ب زێدەبوونا دەنگێ مە و دەربازکرنا بەندێ ١٠% پرانیا کورسیێن کو بۆ باژێرێن باکورێ کوردستانێ ھاتینە ڤەقەتاندن دێ بکەڤیتە دەستێ پارتا مە و ب ھێزبوونا دەستێ گەلێ کورد د پەرلەمانی دا دێ ھەموو ئاستەنگێن ل ھەمبەر چارەکرنا پرسا کوردی ژی ژ ھۆلێ راکەت).

مەرال دانش د دووماھیا ئاخاڤتنا خوە دا ژی ئەو یەک دیار کر کو ئەو وەک پارتا HDP پشتەڤانیێ ل سیستەمێ کو سەرۆک کۆمارێ تورکیا دخوازیت ئاڤا بکەت، ناکەن و داخوازا سەرۆک کۆمار نە ب تنێ سیستەمێ سەرۆکاتیێیە بەلکو ئەردۆگان دخوازیت خوە بکەتە شاھێ تورکیا و ئەڤە ژی دێ ل گەل خوە دکتاتۆریەتێ بینیت، لێ ھەکە وی دڤێت سیستەمەکێ وەک ئەمریکا، روسیا و فرەنسا ئاڤا بکەت ئەم دشێین گەنگەشەیێ ل سەر بکەین).

سەرجان مەحمود بۆ ئەڤرۆ نیوز بەرھەڤکریە

کۆمێنتا تە