فائیزا سه‌لیم: مه 669 جاران سه‌ره‌دانا سه‌نگه‌رێن پێشمه‌رگه‌ی كریه
ئه‌ڤرۆ، شاكر ئه‌تروشی:
ژنه‌كا چالاكڤان ب ناڤێ (فائیزا سه‌لیم سه‌رگه‌لی) كو خه‌لكا پارێزگه‌ها دهۆكێ یه و ب ناسناڤێ (دایكا پێشمه‌رگه‌ی) یا به‌رنیاسه، د دیداره‌كێ دا بۆ رۆژناما ئه‌ڤرۆ گۆت: ده‌مێ ل سالا 2014 شه‌رێ داعش ده‌ستپێكری من هزر دوێ چه‌ندێ دا كر كو پێدڤیه ئه‌م تشته‌كی بۆ برایێن خوه یێن پێشمه‌رگه ئه‌وێن د سه‌نگه‌رێن شه‌ڕی دا بكه‌ین، ل ده‌ستپێكێ من و كچا خوه بتنێ ده‌ست ب چێكرنا خوارنێ كر و بره به‌رۆكێن شه‌ڕی، چوونا مه بۆ سه‌نگه‌ران مه په‌یامه‌ك هه‌بوو ئه‌و ژی مه دڤیا بێژینه پێشمه‌رگه‌ی ماده‌م هوون ب گیانێ خوه به‌ڕه‌ڤانیێ ژ وه‌لاتێ مه دكه‌ن ئه‌م ژی د به‌رهه‌ڤین خزمه‌تا هه‌وه بكه‌ین، چنكو هوون پێشمه‌رگه برا و بابێن مه‌نه، پشتی بۆرینا ده‌مه‌كی گه‌له‌ك كه‌سان په‌یوه‌ندی ب مه كرن و به‌رهه‌ڤیێن خوه دیاركرن كو ئه‌و ژی دحازرن وه‌ك خۆبه‌خش خزمه‌تا پێشمه‌رگه‌ی بكه‌ن، له‌ورا مه گرۆپه‌ك چێكر و ناڤێ وی كره (كارڤین) نوكه ئه‌م (64) كه‌سین ژ هه‌ر دو ره‌گه‌زان و هه‌تا نوكه مه ( 669) سه‌ره‌دان برینه ناڤ سه‌نگه‌رێن پێشمه‌رگه‌ی كو ئه‌و ژی ل هه‌موو میحوه‌ران بوونه و ئه‌م دێ ل سه‌ر سه‌ره‌دانێن خوه دبه‌رده‌وام بین، بۆ زانین ل ده‌ستپێكێ مه ژ مالا خوه ده‌ستپێكر، دووڤدا جیران و مرۆڤێن مه و خه‌لكه‌كێ دی ژی وه‌ك خێرخواز هاتن له‌ورا هه‌ر سه‌نگه‌ره‌كێ ئه‌م دچینێ خوارنێن به‌رفره‌ه بۆ هژماره‌كا زۆرا پێشمه‌رگه‌ی دهێته دانان و هنده‌ك خودانێن كۆمپانیان و سه‌مۆنخانه و نانپێژیان ل گه‌ل مه د پشكداران و هه‌رده‌م سنگێ وان بۆ پێشمه‌رگه‌ی یێ ڤه‌كری یه، و سوپاس بۆ وان هه‌موو كه‌سان ب تایبه‌ت ژی خودانێن كۆمپانیان كو ئه‌و باوه‌ری داینه مه و هنده‌ك ژوان ئه‌رزاقێ هه‌تا هزار كه‌سان پێشكێشی مه كرینه و من و هه‌ڤالێن خوه یێن گرۆپی پێكڤه ئاماده‌كرینه.
هه‌روه‌سا گۆت: هه‌ر چه‌نده مه مووله‌تا فه‌رمی وه‌رگرتیه، لێ مه چو ئاڤاهی یێن تایبه‌ت نینن و پتریا خوارنێن دهێته چێكرن ل مالا من و هنده‌ك ژی ل مالێن ئه‌ندامێن گرۆپی دهێته ئاماده‌كرن، له‌ورا دا گه‌له‌ك یا باش بیت هه‌كه ئاڤاهیه‌كێ تایبه‌ت بۆ گرۆپی دابین كربان.
