كچه‌كا ئاواره په‌رتووكخانه‌ك ل كه‌مپێ ڤه‌كریه
دهۆك، شاكر ئه‌تروشی:
ئه‌میرا عه‌تۆ سلێمان، به‌رنیاس ب (ئه‌میرا شنگاری) كچه‌كا ئاوه‌ره‌یا خه‌لكا كومه‌لگه‌ها خانه‌سۆرێ یه سه‌ر ب قه‌زا شنگارێ ڤه، ل سالا 2014 ژ نه‌چاری به‌ر تیرۆستێن داعش مال و مۆلكێن خوه بجه هێلان و ئاواره‌ی پارێزگه‌ها دهۆكێ بوون و ل كه‌مپا بێرسڤێ سه‌ر ب قه‌زا زاخۆ ڤه ئاكنجی بوون، پشتی ده‌مه‌كی هزر دوێ چه‌ندێ دا كر كو په‌رتووكخانه‌كا بچووك دناڤ وێ كه‌مپا لێ دژیت ڤه‌كه‌ت و مه‌ره‌ما وێ پێ ئه‌و بوو دا گه‌نجێن كه‌مپێ ل خوه خرڤه‌كه‌ت و وان ب خواندنا پرتووكان ڤه مژوول بكه‌ت، به‌لكو هه‌تا راده‌كێ بشێت دلێ وان ئارام بكه‌ت و ئه‌و كه‌س هه‌ست ب غه‌ریبیێ یان دووربوونێ ژ جهێ لێ هاتین نه‌كه‌ن، هه‌روه‌سا ئه‌و نه‌خۆشیێن ل سه‌رده‌مێ داعش ب سه‌ری هاتین هه‌تا راده‌كی ژبیربكه‌ن.
ئه‌میرایێ گۆت: پێنگاڤا ئێكێ مه ژ سفرێ ده‌ستپێكر و هێدی هێدی ده‌ست ب خرڤه‌كرنا پرنووكان كر، نوكه پتری سێ هزار په‌رتووگ و چارسه‌د گۆڤاران د په‌رتووكخانا مه دا هه‌نه و پرتووك د هه‌مه جۆرن ئانكو سیاسی و جڤاكی و ئه‌ده‌بی و زانستی…. هتد و گه‌له‌ك كه‌س و لایه‌نان پرتووك و گۆڤار ب دیاری پێشكێشی په‌رتووكخانا مه كرینه، ژوانا ماموستا ئیسماعیل تاهر جانگیر رێڤه‌به‌رێ په‌رتووكخانا به‌درخانیان ل دهۆكێ كو گه‌له‌ك پرتووك و گۆڤار ب دیاری دانه په‌رتووكخانا مه یا كه‌مپێ و نوكه رۆژانه ئاكنجیین كه‌مپێ ژ هه‌ردو ره‌گه‌زان هه‌روه‌سا ل هه‌موو ژیا دهێته په‌رتووكخانێ و جهێ خواندنێ بۆ هاتیه ئاماده‌كرن، هه‌روه‌سا ل دووف شیانێن خوه ئه‌م شیاینه هنده‌ك خۆلێن جۆرا و جۆر بۆ وان ڤه‌كه‌ین و ئه‌ز داخوازێ ژ هه‌موو نڤیسه‌ران دكه‌م په‌رتووكخانا مه ب پرتووك و به‌رهه‌مێن خوه زه‌نگین بكه‌ن، هه‌روه‌سا رێكخراو جهێن شۆله‌ژێ هاریكاریا په‌رتووكخانێ بكه‌ن.
