كامیران بێتاسی: ژبلی ده‌رهێنانێ حه‌ز ژ ئه‌كته‌ریێ ژی دكه‌م
دهۆك، زنار تۆڤی:
ده‌رهێنه‌ر كامیران بێتاسی، د دیداره‌كێ دا بۆ رۆژناما ئه‌ڤرۆ گۆت: ئه‌ڤه چه‌ندین ساله ئه‌ز كارێ ده‌رهێنه‌ریێ دكه‌م، هه‌ر چه‌نده حه‌زا من گه‌له‌ك ل سه‌ر كارێ ئه‌كته‌ریێ ژی هه‌بوو، لێ من نه‌دشییا ئه‌و فلمێن كو من چێكرین، رۆلێ ئه‌كته‌ریێ تێدا بگێرم، لێ من حه‌ز دكر، رۆژه‌كێ ده‌رهێنه‌ره‌ك من هه‌لبژێریت و رۆله‌كێ بده‌ته من، كو چیرۆكه‌كا ژ هه‌ژی بیت و ئه‌ز ژی خوه تێدا ببینم، هه‌روه‌سا ئه‌ڤه چه‌ندین ساله من ل گه‌ل هه‌ڤالێن خوه یێن ده‌رهێنه‌ر كار كرییه، د فلمه‌كێ ده‌رهێنه‌ر شه‌وكه‌ت ئه‌مین كوركی و خانما ده‌رهێنه‌ر سۆلین یوسف و ده‌رهێنه‌ر هونه‌ر سه‌لیمی و ده‌رهێنه‌ر سامانی، من وه‌كو ئه‌كته‌ر هنده‌ك رۆلێن بچووك تێدا گێڕاینه.
ناڤهاتی گۆت: ڤێ جارێ وه‌كو ئه‌كته‌ره‌كێ سه‌ره‌كی من پشكداری د درامایا ئاخ و تاخ دا كرییه، كو چیرۆكا ڤێ درامایێ گه‌له‌كا خۆشه و ب تاخه‌كێ كه‌ڤن یێ باژێرێ دهۆكێ ڤه یا گرێدایه، د وێ درامایێ دا هنده‌ك كه‌سان دڤێت وی تاخێ كه‌ڤن خراب بكه‌ن و بكه‌نه مۆل، ئه‌ز ژی مۆختارێ وی تاخی مه، ئه‌ڤ درامایه ژ ده‌رهێنانا حسێن حه‌سه‌ن، هه‌روه‌سا حسێنی حه‌ز دكر ئه‌ز ب ڤی رۆلی رابم، پشتی وی ئه‌ز ئاگه‌هدار كریم و من چیرۆكا ڤێ درامایێ زانی، من بریار دا ئه‌ز پشكداریێ تێدا بكه‌م، ئه‌ڤ درامایه به‌رهه‌مێ وار تیڤی یه و ل هه‌یڤا ره‌مه‌زانێ دێ ل سه‌ر شاشا وی كه‌نالی هێته نیشادان، چه‌ند هه‌ڤالان رۆلێ سه‌ره‌كی دڤێ درامایێ دا گێرایه ئه‌ز ژی ئێك ژ وانم، هه‌تا نوكه پتری 20 خه‌له‌كان ب دووماهی هاتینه، هه‌روه‌سا كارێ ده‌رهێنه‌ریێ بۆ من خۆشتره، لێ د سینه‌مایێ دا من حه‌زه‌كا مه‌زن هه‌یه و من دڤێت كارێ ئه‌كته‌ریێ ژی بكه‌م، دیسان د هنده‌ك فلمان دا من كارێ وێنه‌گریێ كریه و دیسان هه‌موو چیرۆكێن وان فلمێن من چێكرین، من ب خوه نڤێسینه، هه‌روه‌سا ل كوردستانێ ئه‌و سینه‌مایا پێشكه‌فتی مه نینه، له‌وما هه‌ر كاره‌كێ هه‌بیت ژ پێخه‌مه‌ت سینه‌مایا كوردی ئه‌ز دكه‌م.
