سالڤه‌گه‌ڕا ته‌حسین تاها و عه‌بدوللا زێڕین ناهێته ساخكرن
ئامێدیێ، مه‌حمود نهێلی:
سالڤه‌گه‌ڕا هه‌ر دو هونه‌رمه‌ندێن مه‌زن ( ته‌حسین تاها و عه‌بدوللا زێڕین) ئه‌ڤ ساله ژی ژبه‌ر ره‌وشا كۆرۆنایێ ناهێته ساخكرن.
نایف چه‌لكی، رێڤه‌به‌رێ ره‌وشه‌نبیری و هونه‌ری ل قه‌زا ئامێدیێ، بۆ ئه‌ڤرۆ دیاركر هه‌ر چه‌نده وان گه‌له‌ك حه‌زدكر سالڤه‌گه‌ڕا وان هه‌ردو هونه‌رمه‌ندێن مه‌زن هاتبا ساخكرن و به‌رنامه‌كێ باش بۆ هاتبا دانن، لێ ژبه‌ركو كۆرۆنا هێشتا جهێ مه‌ترسیێ یه و ساخله‌میا خه‌لكی بۆ وان یا گرنگه، له‌ورا ئه‌و ب باشی دبینن ئه‌ڤ ساله ژی وه‌كو سالێن بۆری نه‌هێته كرن و هیڤی خواستن ل سالا بهێت ره‌وش باش بیت و ئه‌و بشیێن ب جوانترین شێوه سالڤه‌گه‌ڕا وان ساخ بكه‌ن، چنكو ئه‌و هه‌ردو هونه‌رمه‌ند ستێرێن گه‌شێن هونه‌ری نه و گه‌له‌ك خزمه‌تا ستران و مۆزیكا كوردی یێن كرین.
ژلایێ خوه ڤه (دیموكرات تاها) برایێ هونه‌رمه‌ند ته‌حسین تاهای ژی گۆت: ته‌حسین مۆلكێ خه‌لكی بوو، له‌ورا جه‌ماوه‌ركێ باش ل كوردستانێ و ئۆرۆپا هه‌بوو، له‌ورا ده‌مێ ژبۆ چاره‌سه‌ریێ چوویه ئۆرۆپا ل به‌ر بوو پشتی باشبوونا ره‌وشا وی یا ساخله‌میێ هنده‌ك پرۆژێن هونه‌ری یێن مه‌زن ل ده‌رڤه ئه‌نحام بده‌ت و ئه‌ز وه‌كو ژه‌نیارێ كه‌مانێ دا ل گه‌ل پشكدارم، لێ قه‌ده‌رێ رێ نه‌دایێ و چوو به‌ردلوڤانیا خودێ.
