نه‌بوونا ده‌وله‌تێ كاریگه‌ریه‌كا مه‌زن ل سه‌ر سینه‌ما كوردی هه‌یه
زنار تۆڤی:
لینا ره‌زا سینه‌ماكار ( لینا ره‌زا) د دیداره‌كێ دا بۆ رۆژناما ئه‌ڤرۆ دبێژیت: من پشكا راگه‌هاندنێ ل زانكۆیا سلێمانیێ خواندیه، هه‌شت سالان كارێ راگه‌هاندنێ ل هه‌مان باژێر كریه و به‌رنامه‌ك ب ناڤێ سینه‌ما و مۆزایك پێشكێش دكر، پاشی هاتمه بۆارێ سینه‌مایێ و ل سالا بۆری باوه‌رناما ماسته‌رێ د بۆارێ چێكرنا فلمان دا ل له‌نده‌ن وه‌رگرت و من ل به‌ره باوه‌رناما دكتۆرایێ ژی ب هه‌مان بابه‌ت وه‌ربگرم، د هه‌مان ده‌مدا من كورته فلمێ خوه یێ ئێكێ ب ناڤێ (دووریان) چێكریه، كو ده‌مێ وی دوازده خۆله‌ك و نیڤن، هه‌تا نوكه ئه‌ڤ فلمه ل كوردستانێ نه‌هاتییه نیشادان و سێ ئه‌كته‌رێن سه‌ره‌كی د ڤی فلمی دا هه‌نه، ئه‌ڤ فلمه به‌حسێ ژنه‌كێ وه‌كو قاره‌مان دكه‌ت ب ناڤێ (نارین) وێ ژنێ هه‌ڤژینه‌كێ په‌ككه‌فتی هه‌یه، رۆژانه دڤێت خزمه‌تا هه‌ڤژینێ خوه بكه‌ت و د هه‌مان ده‌مدا ل خوارنگه‌هه‌كێ ژی كار دكه‌ت، داكو خێزانا خوه بخودان بكه‌ت، ل دووماهیێ دكه‌ڤیته دناڤبه‌را دو زه‌لامان دا و نه‌شێت هه‌ڤژینێ خوه بهێلیت و دیسان نه‌شێت خودانێ وێ خوارنگه‌هێ ژی بهێلیت، كو وێ ژنێ په‌یوه‌ندیێن ئه‌ڤینی ل گه‌ل گرێداینه، له‌وما من ناڤێ ڤی كورته فلمی كرییه (دووریان) د فلمی دا من بڕیارا دووماهیێ بۆ بینه‌ران هێلایه.
هێشتا گۆت: ئه‌ز وه‌كو سیناریست و ده‌رهێنه‌ر د بۆارێ سینه‌مایێ دا كار دكه‌م، نوكه مژوولی نڤێسینا سیناریۆیه‌كێ مه كو ئه‌و ژی ل سه‌ر ژنانه، و ب دیتنا من نوكه سینه‌ما كوردی د ئاستێ سه‌ره‌تایی دایه، ئه‌م نه‌شێین بێژین مه سینه‌ما هه‌یه، چونكی وه‌كو پێدڤی مه فلمێن سینه‌مایی و ده‌رهێنه‌ر و سینه‌ماكار نینن، نه‌بوونا ده‌وله‌تێ ژی كاریگه‌ریه‌كا مه‌زن ل سه‌ر سینه‌ما كوردی هه‌بوویه، لێ دڤێت ژنێن كورد د خوه راگربن و هه‌موو ئاسته‌نگان ده‌رباز بكه‌ن و د سینه‌مایێ دا كار بكه‌ن، دڤێت جهێن شۆله‌ژێ هاریكاریا ژنان بكه‌ن، دیسان ده‌رهێنه‌رێن ژن ژ تبلێن ده‌ستان نابۆرن، لێ جڤاكێ مه پێدڤی ب ده‌رهێنه‌رێن ژن هه‌یه، هه‌روه‌سا كورته فلمێ (دووریان) چه‌ندین خه‌لاتێن جیهانی وه‌رگرتینه و ئه‌ڤ چه‌نده من هان دده‌ت كو پتر د بۆارێ سینه‌مایێ دا كار بكه‌م.
