كۆرۆنایێ كاریگه‌ریه‌كا مه‌زن ل سه‌ر هونه‌ری هه‌بوویه
زنار تۆڤی:
مۆزیكژه‌ن ئالان محه‌مه‌د سه‌دیق، به‌رنیاس ب ئالان فلۆت، كو ل باژێرێ سلێمانیێ ژ دایكبوویه و نوكه ژی ل هه‌مان باژێر دژیت و ئه‌ندامێ ئۆركێسترا وی باژێری یه و ئه‌ندامێ گرۆپێ مۆزیكێ یێ سه‌هه‌نده، د دیداره‌كێ دا بۆ رۆژناما ئه‌ڤرۆ دبێژیت: ئه‌ز ده‌رچوویێ پشكا مۆزیكێ یه ل زانكۆیا سلێمانیێ، من ئامیرێ فلۆتێ هه‌لبژارتیه، چونكو حه‌زه‌كا تایبه‌ت ل سه‌ر ڤی ئامیرێ هه‌وایی هه‌بوو، و ئه‌ز حه‌ز دكه‌م ب ره‌نگه‌كێ باشتر ڤی ئامیری بۆ خه‌لكێ بده‌مه نیاسین.
ناڤهاتی گۆت: ره‌نگڤه‌دانا هونه‌ری ب ره‌نگه‌كێ ته‌مام ل سه‌ر جڤاكی هه‌یه و دیسان یا جڤاكی ژی ل سه‌ر هونه‌ری هه‌یه، لێ ژ ئه‌گه‌رێ په‌یدابوونا كۆرۆنایێ و قه‌یرانا دارایی كاریگه‌ریه‌كا مه‌زن ل سه‌ر هونه‌ری په‌یدا بوویه، ب تایبه‌تی ئه‌ڤ كاریگه‌ریه ل مۆزیكێ یا دیاره، هه‌ر چه‌نده مۆزیك ل گه‌ل هه‌موو خۆشی و نه‌خۆشیێن جڤاكی یا به‌رده‌وامه، لێ ئێدی وه‌كو به‌رێ چالاكیێن هونه‌ری ناهێنه ئه‌نجامدان و ئه‌ڤه ده‌مێ شه‌ش هه‌یڤانه ئه‌ز ل گه‌ل گرۆپێ سه‌هه‌ند یێ مۆزیكێ یێ خوه به‌رهه‌ڤ دكه‌ن بۆ ئه‌نجامدانا كۆنسێرته‌كێ ل باژێرێ سلێمانیێ، مه ل به‌ره ڤێ كۆنسێرتا مۆزیكێ ل پاركا هه‌واری شار ل شانۆیا رۆمانی ئه‌نجام بده‌ین، دابه‌شكرنا موزیكێ ژ ئالیێ ئه‌ندامێن ڤی گرۆپی ڤه هاتییه كرن، دیسان مه ل به‌ره ل ڤان نێزیكان هنده‌ك مۆزیكه كلیپان ژی ب ئامیرێ فلۆتێ چێكه‌ین.
