رێگری لێ هاته‌كرن و نه‌هێلان كارگه‌هه‌كا یاریێن زارۆیان ڤه‌كه‌ت
شاكر ئه‌تروشی:
خۆلقی سه‌بری حاجی، به‌رنیاس ب (خۆلقی ئه‌رگۆشی) كه‌سه‌كێ ده‌ست ره‌نگینه نوكه ل باژێرێ هه‌ولێر دژیت، د دیداره‌كێ دا بۆ رۆژناما ئه‌ڤرۆ دبێژیت: ل سالا 1993 ل باژێرێ ته‌هران پایته‌ختێ وه‌لاتێ ئیرانێ ئه‌ز چوومه به‌ر كارگه‌هه‌كا چێكرنا یاریێن زارۆیان من كاركر ومه كه‌سایه‌تیێن فلم كارتۆنان چێدكرن و ژبه‌ركو ئه‌ز دیزاینه‌ر و درینكاره‌كێ باش بووم هه‌ر زوو فێری وی كاری بووم و من ب خوه كارگه‌هه‌ك بۆ خوه ڤه‌كر و پتری (156) كه‌سان ل ده‌ف من كاردكرن و به‌رهه‌مێ مه ب باشی هاته نیاسین و بكڕێن مه د مشه‌بوون، ل سالا 1998 ل دووف داخوزا حكومه‌تا هه‌رێما كوردستانێ كو گۆتنه من وه‌ره ڤێ كارگه‌هێ ل كوردستانێ ڤه ئه‌م دێ پشته‌ڤانیا ته‌كه‌ین، ئه‌ز هاتمه هه‌ولێرێ و مه به‌رهه‌مێن خوه ل د پێشلنگه‌هان دا نیشادان، پشتی ده‌مه‌كی پارچه‌كا عه‌ردی ل به‌حركێ و هنده‌ك پاره بۆ ئاڤاكرنا كارگه‌هێ دانه مه، لێ مخابن كه‌سه‌كێ دی حه‌زدكر ئه‌و كارگه‌ه بۆ وی بیت له‌ورا ئاسته‌نگ هاتنه پێش و هه‌تا نوكه ئه‌م نه‌شیاینه ئاڤا بكه‌ین و هه‌كه نوكه ژی ده‌لیڤا ئاڤاكرنا كارگه‌هێ بهێته دان دێ به‌رهه‌مه‌كێ باش ب ناڤێ كوردستانێ چێكه‌ین، ئانكو ل شوونا وان یاریان یان له‌نگان بۆمه ژ ده‌رڤه‌ی وه‌لاتی بینن ئه‌م دێ ل ڤێره چێكه‌بن و ره‌وانه‌ی ده‌رڤه‌ی هه‌رێمێ ژی كه‌ین.
ل دووماهیێ گۆت: ل سالا 2003 ئه‌زچوومه چه‌ند خۆلێن فێركرنا خوارنان و من خوارنگه‌هه‌ك بۆ خوه ڤه‌كر، لێ نوكه وه‌ك شیفه‌كێ تایبه‌ت كاردكه‌م.
