28 ساله كارێ ده‌رهێنانێ دكه‌ت
زنار تۆڤی:
ده‌رهێنه‌ر محه‌مه‌د حه‌جی، د دیداره‌كێ دا بۆ رۆژناما ئه‌ڤرۆ دیار كر كو ل سالا 1993 ل رادیۆیێ وی ده‌ست ب كاراێ ده‌رهێنانێ كریه، ل ده‌ستپێكێ ل رادیۆیا ده‌ڤه‌را ئامێدیێ، كو باره‌گایێ وێ ل سه‌رسنكێ بوویه، پاشی ئه‌و رادیۆ بۆ لژنا ناوچا ئامێدیێ هاته ڤه‌گۆهاستن، چه‌ندین سالان ل وێرێ كار كریه، ل سالا 2000 هاتییه رادیۆیا دهۆكێ و هه‌تا نوكه وه‌كو ده‌رهێنه‌رێ به‌رنامان كاردكه‌ت.
ناڤهاتی گۆت: هه‌تا نوكه من كارێ ده‌رهێنانێ بۆ پتری 50 به‌رنامان ل رادیۆیا دهۆكێ كریه و هنده‌ك جاران ژی من نووچه خواندینه، لێ پتر حه‌ز ژ كارێ ده‌رهێنه‌ریێ دكه‌م، نوكه ژی ب شه‌ڤ كارێ ده‌رهێنانێ بۆ به‌رنامێ شه‌ڤ و شڤان دكه‌م و رۆژانه كارێ ده‌رهێنانێ بۆ چه‌ندین به‌رنامێن دی دكه‌م، هه‌روه‌سا من پشكداری د پارچه ته‌مسیلیێن رادیۆیێ دا كریه و هنده‌ك جاران رۆژێ هه‌موویێ مایمه ل رادیۆیا دهۆك و كارێ ده‌رهێنانێ كریه، بۆ من به‌رنامێن هه‌مه‌ره‌نگ خۆشترن ژ یێن دی و من هزر نه‌كریه كارێ ده‌رهێنانا ته‌له‌ڤزیۆنی بكه‌م، بۆ من رادیۆ گه‌له‌ك خۆشتره و ئه‌ڤه 28 ساله من عه‌مرێ خوه ل گه‌ل رادیۆیێ بۆراندیه، ئه‌ز گه‌له‌ك حه‌ز ژ رادیۆیا دهۆك دكه‌م و من ل به‌ر نینه ل چو رادیۆیێن دی كار بكه‌م، چنكو رادیۆیا دهۆك مالا منه.
