شیره‌تكارێ سه‌رۆكێ حوكمه‌تا هه‌رێمێ: كۆمپانیه‌كا نیشتمانی د بوارێ په‌ترۆلێ دا دێ هێته دامه‌زراندن
ئه‌ڤرۆ:
شیره‌كارێ سه‌رۆكێ حوكمه‌تا هه‌رێما كوردستانێ بۆ كاروبارێن وزێ راگه‌هاند، وه‌زاره‌تا سامانێن سروشتی كار بۆ ب ده‌زگه‌هكرنا خوه دكه‌ت و بریاره كۆمپانیه‌كا نیشتمانی د بوارێ په‌ترۆلێ دا بهێته دامه‌زراندن، كو ب وێ چه‌ندێ دێ داهاتێ هه‌رێما كوردستانێ زێده بیت و كه‌رتێ په‌ترۆلێ ژی د هه‌موو بواراندا دێ هێته رێكخستن.
د. بێوار خنسی، شیره‌تكارێ سه‌رۆكێ حوكمه‌تا هه‌رێما كوردستانێ بۆ كاروبارێن وزێ گۆت” وه‌زیرێ سامانێن سروشتی كار دكه‌ت بۆ ده‌زگه‌هكرنا وه‌زاره‌تا سامانێن سروشتی ب گۆره‌ی قانوونا په‌ترۆل و غازێ ل هه‌رێما كوردستانێ كو ل سالا 2007 هاتیه ده‌ركرن، كو ئه‌و وه‌زاره‌ت ژ حه‌فت ده‌زگه‌هێن گه‌له‌ك گرنگ پێكهاتیه ئه‌وژی رێكخستنا پرۆسا په‌ترۆلێ و لێگه‌ریانا په‌ترۆلێ و ڤه‌دیتن و ده‌رئێنان و ڤه‌گوهاستن و پالاوتن، ئه‌ڤه ژی ب رێیا دامه‌زراندنا كۆمپانیه‌كا نوو بۆ وێ چه‌ندێ هه‌ر ئێك ب كارێ خوه رابیت، بێگومان ئه‌ڤه ژی وه‌دكه‌ت كار ب جوانی بهێنه رێكخستن و ب ڤێ چه‌ندێ دێ داهاتێ هه‌رێما كوردستانێ زێده بیت”.
خنسی پتر رۆهنكر” هه‌كه حوكمه‌تا هه‌رێما كوردستانێ كۆمپانیا نیشتمانی یا په‌ترۆلێ دامه‌زراندبا كو ناڤێ وێ كۆمپانیا (كیبكۆ) یه، و وێ كۆمپانیێ كارێن خوه ب رێكوپێكی ب رێڤه‌بربان و ئه‌و 450 هزار به‌رمیلێن په‌ترۆلێ یێن نوكه دهێنه به‌رهه‌مئینان، داهاتیێ 80 هزار به‌رمیلێن په‌ترۆلێ بۆ وێ بوون، كو داهاته‌كێ زۆر بوو و دشیا ل گه‌ل كۆمپانیێن جیهانی وه‌كو (شێل و تۆته‌ل) ببیته هه‌ڤپشك و ل ده‌رڤه‌ی هه‌رێما كوردستانێ ژی كار بكه‌ت، كو نوكه دشیا زێده‌تر هاریكاریا هه‌رێمێ بكه‌ت دده‌مێ ته‌نگاڤیاندا و نوكه ژی باشه كار ل سه‌ر بهێته كرن و ئه‌ڤه كاره‌كێ گرنگه و دێ كارێ په‌ترۆلێ رێكئێخیت و دێ رۆهنتر ژی بیت، چونكی ئه‌و كۆمپانیه نه‌كو تنێ دا كارێ ده‌رئینانێ كه‌ت، به‌لكو دا په‌ترۆلێ ژ ب پیشه‌سازی كه‌ت، چونكی هه‌كه بهایێ به‌رمیله‌كا په‌ترۆلێ ب 76 دۆلاران بیت، هه‌كه ببیته پیشه‌سازی، حوكمه‌تا هه‌رێما كوردستانێ دێ گه‌له‌ك ژ وی بهای زێده‌تر پاره ب ده‌ست كه‌ڤیت”.
ناڤبری به‌حسێ وێ چه‌ندێ ژی كر كو بریاره سێ كۆمپانی بهێنه دروستكرن، كو ئێك ژوان یا به‌رهه‌مئینانێ یه و یا دویێ یا پالاوتنێ یه و یا سیێ ژی یا لێگه‌ریانێ یه ل دووڤ په‌ترۆلێ، ئه‌ڤه ژی هاریكاریه‌كا باشه بۆ ب رێڤه‌برنا كه‌رتێ په‌ترۆلا هه‌رێمێ و دێ بیته ئه‌گه‌ر داهاتیێ هه‌رێمێ زێده ببیت، چونكی ل ده‌مێ بۆری دا ژ ئه‌گه‌رێ ئه‌و قه‌یرانێن دروست بووین، ئه‌ڤ چه‌نده نه‌هاته كرن، به‌لێ د نوكه دا كار یێ ل سه‌ر دهێته كرن، ب ڤێ چه‌ندێ ژی ئابوورێ هه‌رێما كوردستانێ دێ زێده‌تر سه‌ربخوه بیت”.
