زێده‌تری هزار ته‌نێن گه‌نمی ل سایلۆیا شێخان هاتینه وه‌رگرتن
شێخان، بارزان مزووری:
رێڤه‌به‌رێ سایلۆیا شێخان بۆ رۆژناما ئه‌ڤرۆ دیار كر، بڕیاربوو ئه‌ڤ ساله 60 هزار ته‌نێن گه‌نمی یێن قه‌زایێن شێخان و ئاكرێ و به‌رده‌ره‌ش ل سایلۆیا شێخان بهێنه وه‌رگرتن و دبێژیت: ب مخابنی ڤه ئه‌ڤ ساله هه‌تا نوكه كێمتر ژ دو هزار ته‌نێن گه‌نمی هاتینه وه‌رگرتن.
ته‌یب تاهر، رێڤه‌به‌رێ سایلۆیا شێخان خویا كر، ژبلی كارتێكرنا بارانێ و كێزا كیسه‌له‌ی ئه‌و جۆتیارێن گه‌نم هه‌ی پشتی پشكنینێ هه‌كه پله دو یان سێ بایه وان جۆتیاران گه‌نمێ خوه راده‌ستی سایلۆیێ نه‌دكر و ئێكسه‌ر بۆ سایلۆیێن مووسل دبر، ژ به‌ركو ل وان سایلۆیا ب پاره و ب پله ئێك دهاته وه‌رگرتن.
ناڤهاتی گۆت: “هه‌ر سایلۆیه‌كا گه‌نمی وه‌ردگریت یێ خراپ یان باش بیت ئه‌و گه‌نم بۆ كارگه‌هێن ئاری دێ هێته ڤه‌گوهاستن و زیان ب وه‌لاتیان كه‌ڤیت، ژ به‌ركو ئه‌و ئار دێ ل سه‌ر وه‌لاتیان هێته به‌لاڤكرن”.
سه‌ردار یه‌حیا عه‌بدولعه‌زیز، قایمقامێ قه‌زا شێخان بۆ رۆژناما ئه‌ڤرۆ دیار كر، ئه‌و جۆتیارێن گه‌نم ل شێخان چاندی، پتریا وان گه‌نمێ خوه دبره سایلۆیێن مووسلێ، ژ به‌ر وێ گه‌نده‌لیا ل سیلۆیێن وان د وه‌رگرتنا گه‌نمی دا دكر و گه‌نمێ خراپ ژی ب پله ئێك وه‌ردگرت.
