سۆپایێ توركیا ل66 هاڤینگه‌هێن زاخۆ ئاكنجی بوویه
زاخۆ، عه‌لی حاجی:
رێڤه‌به‌رێ گه‌شت و گوزارێ ل زاخۆ دیار كر، د ده‌مێ 10 رۆژێن بۆری دا رێژه‌یه‌كا زۆر یا گه‌شتیارێن ناڤخوه و ده‌ڤه‌رێن عیراقێ قه‌ستا باژێرێ زاخۆ كرینه.
چیا ئه‌مین، رێڤه‌به‌رێ گه‌شت و گوزارێ ل زاخۆ بۆ ئه‌ڤرۆ گۆت: “20 هزار گه‌شتیارێن ناڤخوه و ده‌ڤه‌رێن عیراقێ قه‌ستا باژێرێ زاخۆ كرینه، ئه‌ڤ رێژه‌یه ژی یا دلخوه‌ش كه‌ره، ژ به‌ر كو هه‌م كوردستان د قووناغه‌كا ب زه‌حمه‌ت یا پێلا سێیێ یا كۆرۆنایێ دایه و هاڤینگه‌هێن زاخۆ ژی كه‌فتینه به‌ر پێلا شه‌رێ په‌كه‌كێ و سۆپایێ توركیا كو نێزیكی 66 هاڤینگه‌هێن مه د نوكه دا سۆپایێ توركیا لێ ئاكنجی بوویه و ڤێ چه‌ندێ ژی كارتێكرنا خوه ل سه‌ر ڤه‌ژانا كه‌رتێ گه‌شتیاری ل باژێرێ زاخۆ هه‌بوو”.
گۆتژی: “ژ وان 20 هزار گه‌شتیاران، دو هزار گه‌شتیارێن ده‌ڤه‌رێن جودا یێن كوردستانێ بوون، ئه‌ڤه ژی هژماره‌كا باشه، ژ به‌ركو پێدڤی یه ئێدی ئه‌م گرنگیێ ب گه‌شتیارێن ناڤخوه ژی بده‌ین، نه‌ك قه‌ستا وه‌لاتێن ده‌وروبه‌ر بكه‌ن، دیسا رێژه‌كا باش یا وه‌لاتیان ژ ده‌رڤه‌ی عیراقێ ژی قه‌ستا ده‌ڤه‌رێن مه كرینه”.
