ئه‌ڤ ساله رێوره‌سمێن جه‌ژنا چلێ هاڤینێ ناهێنه كرن
شێخان، بارزان مزووری:
بابه شێخێ ئیزدیان بۆ رۆژناما ئه‌ڤرۆ دیار كر، ژ به‌ر مه‌ترسی و به‌لاڤبوونا ڤایرۆسێ كۆرۆنا، ب بڕیارا میر و جڤاتا روحانیا ئیزدیان ئه‌ڤ ساله چو رێوره‌سمێن جه‌ژنا چلێ هاڤینێ ل په‌رستگه‌ها لالش ناهێنه كرن.
شێخ عه‌لی، بابه شێخێ ئیزدیان گۆت: “جه‌ژنا چلێ هاڤینێ ل گشت ئیزدیان پیرۆز دكه‌ین، هیڤیدارین ژ خودێ پشتی ڤێ جه‌ژنێ بییته خوشی د ناڤ ملله‌تی دا و ئه‌ڤ نه‌خوشیه ژناڤ بچیت”.
شه‌رۆ ئیبراهیم، خلمه‌تكار ل په‌رستگه‌ها لالش بۆ رۆژناما ئه‌ڤرۆ دیار كر، سالانه بۆ ده‌مێ سێ رۆژان هژماره‌كا مه‌زن یا ئێزدیێن كوردستانێ و ده‌رڤه‌ی وه‌لاتی پشكداری د رێوره‌سمێن جه‌ژنا چلێ هاڤینێ دا ل په‌رستگه‌ها لالش دكرن، به‌لێ ئه‌ڤ ساله ژ به‌ر بڕیارا میر و جڤاتا رۆحانیا ئیزدیان رێوره‌سم ناهێنه كرن.
وی خلمه‌تكارێ په‌رستگه‌ها لالش خویا كر، ئه‌ڤ جه‌ژنه كه‌ڤنترین جه‌ژن دهێته هژمارتن د ناڤ ئاینێ ئیزدیان دا، به‌ری جه‌ژنێ كه‌سایه‌تیێن ئایینی بۆ ده‌مێ 40 رۆژان، ب رۆژی دبن، د گه‌رمترین رۆژێن چلێ هاڤینێ دا.
