شاره‌زایه‌كێ سیاسه‌تا ئه‌مریكی: هه‌كه ئه‌مریكا ب ئێكجاری خوه ژ ئیراقێ ڤه‌كێشیت دێ ره‌وشا وێ ژ ئه‌فغانستانێ خراپتر بیت
هه‌ولێر، قائید میرۆ
ب گۆره‌ی رێكه‌فتنا د ناڤبه‌را ئه‌مریكا و ئیراقێ دا، بڕیاره هه‌تا دوماهیا ئه‌ڤساله ئه‌مریكا هه‌موو هێزێن خوه یێن شه‌ڕكه‌ر ل ئیراقێ ڤه‌كێشیت، شاره‌زایه‌كێ سیاسه‌تا ئه‌مریكا ژی ره‌تكر ئه‌مریكا هێزێن خوه ل ئیراقێ ڤه‌كێشیت و دبێژیت، ئه‌مریكا ده‌ستێ خۆ ژ ئیراقێ به‌رناده‌ت و هه‌رده‌مێ ئه‌مریكا ب ته‌مامی ل ئیراقێ بهێته ڤه‌كێشان، دێ كۆده‌تا ل ئیراقێ هێته‌كرن.
ل حه‌فتیا بۆری دانوستاندنێن ستراتیژی د ناڤبه‌را ئه‌مریكا و ئیراقێ دا بڕێڤه‌چوون و ب گۆره‌ی رێكه‌فتنا د ناڤبه‌را ئیراق و ئه‌مریكا دا، هه‌تا دوماهیا ئه‌ڤساله ئه‌مریكا دێ هێزێن خوه یێن شه‌ڕكه‌ر ل ئیراقێ ڤه‌كێشیت، به‌ها ئه‌عره‌جی، شیره‌تكارێ ئاسایشا نیشتیمانی ل ئیراقێ راگه‌هاند” دچارچوڤێ كۆمبوون و دانوستاندنێن د ناڤبه‌را ئیراق و ئه‌مریكا دا مه ب ئاشكرا گوتیه ئه‌مریكا ئیدی ئیراقێ ژلایێ له‌شكری ڤه پێدڤی ب ئه‌مریكا نه‌مایه و پێدڤیه هێزێن شه‌ڕكه‌رن بهێنه ڤه‌كێشان، تنێ تیمێن شیره‌تكاری و هه‌ماهه‌نگی ل ئیراقێ بمینن بۆ به‌رهنگاربوونا تیرۆرستێن داعشێ.
كارۆخ خۆشناو، شاره‌زا د سیاسه‌تا ئه‌مریكا دا بۆ رۆژناما ئه‌ڤرۆ گۆت” ئه‌مریكا چو جاره‌كێ ده‌ستبه‌رداری ئیراقێ نابیت، به‌لێ مه پێشبینی دكر بڕیاره‌كا هوسا ده‌ركه‌ڤیت بۆ ڤه‌كێشانا سه‌ربازێن ئه‌مریكی ل ئیراقێ، ده‌رچوونا ڤێ بڕیارێ تنێ بۆ رازیكرنا ئیراقێ یه، هه‌تا بێژن بڕیارا په‌رله‌مانی بۆ ده‌ركرنا هێزێن بیانی ل ئیراقێ هاته بجهئینان، به‌رۆڤاژی نه ئیراق دخوازیت ئه‌مریكا خوه ڤه‌كێشیت و نه ئه‌مریكا ژی یا به‌رهه‌ڤه خوه ژ ئیراقێ ڤه‌كێشیت، ب چو شێوه‌یه‌كی ئه‌مریكا ده‌ستا ژ ئیراقێ به‌رناده‌ت و هه‌كه هێزێن خۆژی ڤه‌كێشیت، ب رێیا تیمێن خوه یێن راهێنانێ دێ هێزێن خوه هه‌ر هێلیت ل ئیراقێ و بناڤێ جودا دێ ئه‌مریكا ل ئیراقێ یا به‌رده‌وام بیت”.
كارۆخ خۆشناو گۆت ژی” هه‌كه بهێت و ئه‌مریكا ب ئێكجاری ژ ئیراقێ خوه ڤه‌كێشیت یان سه‌ربازێن خوه ڤه‌كێشیت ئه‌ڤه ره‌وشا ئیراقێ دێ ژ ئه‌فغانستانێ خراپتر بیت، چونكه هژماره‌كا زۆر یا گرۆپ و هێزێن چه‌كدار یێن نه‌فه‌رمی و میلیشیا ل ئیراقێ یێن هه‌ین و پشتی ڤه‌كێشانا ئه‌مریكا دێ ئه‌و هێز كۆده‌تایێ ل سه‌ر حوكمه‌تا ئیراقێ كه‌ن، له‌وڕا ئه‌مریكا یا به‌رهه‌ڤ نینه خوه ڤه‌كێشیت”.
فوئاد حوسێن، وه‌زیرێ ده‌رڤه‌یێ ئیراقێ د كۆنگره‌یه‌كێ رۆژنامه‌ڤانی دا گۆت” حه‌فتیا بۆری گه‌ڕا چارێ یا دانوستاندنێن ستراتیژی د ناڤبه‌را ئیراق و ئه‌مریكا دا بڕێڤه‌چوون و تێدا رێكه‌فتن ل سه‌ر پێنج خالان هاته‌كرن، ژوان ئه‌مریكا دێ رێزێ ل سه‌روه‌ری و قانوونێن ئیراقێ گریت، هه‌روه‌سا ئیراق دێ به‌رده‌وام بیت لسه‌ر پاراستنا ئه‌ندامێن هه‌ڤپه‌یمانیا نێڤده‌وله‌تی، بتایبه‌تی ئه‌وێن راهێنانی ب هێزێن ئه‌منی یێن ئیراقی دكه‌ن، خاله‌كا دی ئه‌وه ئه‌و بنگه‌هێن هێزێن هه‌ڤپه‌یمان تێدا ب گۆره‌ی قانوونێ بنگه‌هێن ئیراقی نه و ئیراق دێ بڕێڤه‌به‌ت، خاله‌كادی ژی گرێدایی ڤه‌كێشانا هێزێن ئه‌مریكایه ژ ئیراقێ كو دڤێت هه‌تا ٣١ی هه‌یڤا كانوونا ئێكێ یا ئه‌ڤساله چو هێزه‌كا شه‌ڕكه‌ر یا ئه‌مریكی ل ئیراقێ نه‌مینیت”.
