په‌روه‌رده د هزرا سه‌رۆك بارزانی دا
په‌روه‌رده د هزرا سه‌رۆك بارزانی دا
گرنگیا په‌روه‌ردێ د به‌رنامه‌یێ پارتی دا
ئیسماعیل بادی
د په‌یڤا خوه یا ل دۆر ده‌ستپێكرنا بانگه‌شه‌یا هه‌لبژارتنان، سه‌رۆك بارزانی؛ داخواز ژ سه‌رۆكاتییا هه‌رێمی و سه‌رۆكاتییا ئه‌نجومه‌نێ وه‌زیران و حوكمه‌تا هه‌رێما كوردستانێ كر؛ كو گرنگیێ ب كه‌رتێ په‌روه‌ردێ بده‌ن، داكو هه‌ستا نه‌ته‌وه‌یی ل جه‌م قوتابییێ كورد خورت بكه‌ن، داكو ئه‌وێن ل سه‌ر گه‌نجا كار دكه‌ن، كو وان ژ هه‌ستا كوردبوونێ و نه‌ته‌وه‌بوونا خوه پاشگه‌ز ببن، سه‌رتیرا وان ببه‌ران بكه‌ڤیت و ئه‌ڤ گه‌نجه هه‌ر ژ قۆناغا ده‌ستپێكا خواندنێ، بهێنه په‌روه‌رده كرن و پێدڤیه مامۆستا رۆلێ خوه ببینن.
د هه‌ر جڤاكه‌كێ دا، په‌روه‌رده‌یێ رۆله‌كێ به‌رچاڤ هه‌یه ژبۆ پێگه‌هاندنا خورت و لاوێن وی ملله‌تی بۆ به‌ره‌ف پێشڤه‌برنێ بۆ قۆناغێن مه‌زنتر و بده‌ستڤه‌ئینانا پتر ئارمانج و هیڤی و ئومێدێن هه‌می تاكێن وی جڤاكی. په‌روه‌رده رێیا دروستا پێشڤه‌چوونا هه‌ر ملله‌ته‌كی یه، ئاڤاكرنا كه‌سایه‌تییا گه‌نجێن وی ملله‌تی یه. ب رێیا خواندن و زانینێ؛ چو پێ نه‌ڤێت ئه‌و ملله‌ت دێ گه‌هیته هه‌می هیڤی و ئارمانجان و چو دژمن نه‌شێن وی ملله‌تی بچه‌وسینن.
هه‌كه ل دیرۆكا پارتی بزڤڕین، دێ بینین د هه‌می قۆناغێن خه‌باتا خوه دا، گرنگیه‌كا زێده ب بیاڤێ په‌روه‌ردێ دایه، ل بیرا مه‌یه چاوا د شۆڕه‌شا ئیلۆنێ دا، ل هه‌می گوندان ده‌رگه‌هێن قوتابخانا هاتنه ڤه‌كرن و قوتابی ژ خواندنێ بێبار نه‌بوون، كو ئه‌م ئێك ژ وان قوتابیان بووین. سه‌ره‌ڕای هه‌بوونا شه‌ڕه‌كێ دژوار و رۆژانه فرۆكێن دوژمنی گوند و ده‌ڤه‌رێن كورستانێ بومبه‌باران دكرن، ل پێشچاڤه چاوان قوتابیێن زانكۆیا سلێمانیێ ده‌ما ل باژێركێ قه‌لادزێ بۆمبه‌ران كری و كۆمه‌كا گه‌نج و لاوان د وان رۆژێن سه‌خت دا، كرینه قوربان. هه‌ر چه‌نده؛ هند مامۆستا وه‌كو پێدڤی دبیت نه‌بووینه، لێ سه‌ركردایه‌تیا شۆڕه‌شا ئیلۆنێ قوتابیێن زانكۆیی ل چه‌ندین گوندان كرنه مامۆستا، داكو خواندن برێڤه بچیت و قوتابی ژ خواندنێ بێبار نه‌بن.
هه‌روه‌سا ل ده‌مێ شۆڕه‌شا گولانێ ژی، ل پتریا گوندێن ئازادكری؛ قوتابخانه هه‌بووینه، دیسا پشتی ئه‌نفالان ژی، ل كه‌مپێن په‌نابه‌ران ل توركیا، هه‌كه لێزڤڕینه‌كێ ل وان رۆژێن سه‌خت بكه‌ین، دێ بینین كو په‌روه‌رده، ژ خالێن گرنگ بوویه كو پارتی گرنگی پێدایی و چه‌ندین قوتابخانه هاتنه ڤه‌كرن و په‌یره‌و و پرۆگرامێ خواندنێ بۆ هاته داڕژتن
د په‌یڤا خوه دا سه‌رۆك بارزانی؛ چه‌ند خالێن گه‌له‌ك گرنگ دانه به‌رچاڤ، تایبه‌ت د وارێ په‌روه‌ردێ دا، ده‌ما گۆتی:”جاران دوژمنا شه‌ڕێ مه ب چه‌كێ تۆپ و فرۆكه‌یان دكر، لێ ئه‌ڤرۆ یێ ب چه‌كه‌كێ دیتر و ب شێوازه‌ك جیاوازتر گه‌له‌ك مه‌تڕسیتره ژ چه‌كێ تۆپ و فرۆكه‌یان؛ یێ شه‌ڕی دگه‌ل ملله‌تێ مه دكه‌ن، ئه‌وژی ئه‌وه دۆژمنێن مه یێ ب هه‌می شێوه‌یان پێكۆڵێ دكه‌ن، ئینتیمائێ بۆ گه‌ل و وه‌ڵاتی ل ده‌ف گه‌نجێن مه نه‌هێلن و ئه‌ڤه جهێ مه‌تڕسیێ یه.. له‌ورا پێدڤیه گرنگیێ ب كه‌رتێ په‌روه‌ردێ بده‌ین، هه‌ر ژ پۆلا ئێكێ بنه‌ڕه‌تی ده‌سپێبكه‌ت بۆ دروستكرنا ئینتیمائا نه‌ته‌وه‌یی و نیشتمانی”. له‌ورا گه‌له‌ك فه‌ره حه‌ز و ڤیانا ملله‌تی، ڤیانا ئاخا كوردستانێ د ناخێ كچ و كوڕێن ملله‌تێ كورد دا بهێته چاندن. داكو ده‌سته‌یه‌كا تێگه‌هشتی ب بیروباروه‌رێن كوردایه‌تییێ بهێنه په‌روه‌رده‌كرن و ل پاشه‌رۆژێ بشێن خزمه‌تا وه‌لاتێ خوه بكه‌ن.
هه‌روه‌سا گرنگیدان نه تنێ ئه‌وه ده‌رگه‌هێ قوتابخانا بهێته ڤه‌كرن، لێ خالا گرنگ پویته‌دانه ب مامۆستا و پێدڤیێن قوتابخانان، هه‌ر ژ ئاڤاهی و پێدڤیێن خواندنێ ژ په‌یره‌و و پرۆگرامێن خواندنێ و مشه‌كرنا هۆكارێن خواندنێ و به‌روبیاڤێ خۆشكرن و شرینكرنا خواندنێ یه ل نك قوتابییان. هه‌روه‌سا خالا ژ وان ژی گرنگتر، گرنگیدانه ب مامۆستایان و شایسته‌یێن وان كو ئه‌ڤه فه‌ره ل سه‌ر په‌رله‌مانتاران خه‌مه‌كێ ژ ڤێ مژارێ بخون و گۆتنا سه‌رۆك بارزانی بۆ وان ببیته ده‌رگه‌هه‌ك بۆ ڤه‌كرن و بجهئینانا ڤی ئه‌ركێ پیرۆز. دیسا فه‌ره مامۆستا ژی خوه پتر بوه‌ستینن بۆ چاندنا ڤێ هزرا پیرۆز د سه‌رێ هه‌ر قوتابیه‌ه‌كی دا.
هه‌روه‌سا خالا ژ هه‌میان گرنگتر، په‌یره‌و و پرۆگرامێ خواندنێ، پێدڤی ب پێداچوون و گوهۆڕینێ یه، نه‌خاسمه ئه‌و خالێن سه‌رۆك بارزانی ئاماژه پێدایی، چاوانیا چاندنا هزرا (ژیبوونا نه‌ته‌وه‌یی و نیشتمانی)، پێدڤیه وانه‌یێن تایبه‌ت بۆ بجهئینانا ڤێ خالێ هه‌بن. كو ب دیتنا مه شه‌هره‌زایێن بیاڤێ په‌روه‌ردێ، ڤێ چه‌ندێ ژ مه چێتر دزانن كا چ پێدڤیه و چ بكه‌ن داكو ئه‌ڤ ژێبوونه (ئینتیمائه) ل نك ته‌خا گه‌نجان بزڤڕیته‌ڤه و بهێنه گرێدان ب ئاخ و وه‌لاتێ خوه‌ڤه.
