داخوازا هنارتنا پرۆژه‌یاسایا بودجا 2022 بۆ په‌رله‌مانی دهێته كرن
ئه‌ڤرۆ:
لژنا دارایی و كاروبارێن ئابووری ل په‌رله‌مانێ كوردستانێ و وه‌زیرا هه‌رێمێ بۆ كاروبارێن په‌رله‌مانی دوپاتیێ ل هنارتنا پرۆژه‌یاسایا بودجا سالا 2022 بۆ په‌رله‌مانی دكه‌ن.
ب مه‌ره‌ما دانوستاندنێ ل سه‌ر پرۆژه‌یاسایا راستڤه‌كری یا وه‌زاره‌تا دارایی و ئابووری یا حوكمه‌تا هه‌رێما كوردستانێ (كۆمپانیا دلنیایی) لژنا دارایی و كاروبارێن ئابووری ل په‌رله‌مانێ كوردستانێ ب سه‌رپه‌رشتیا زیاد جه‌بار، سه‌رۆكێ لژنێ و به‌رهه‌ڤبوونا جێگرێ سه‌رۆكێ لژنێ و ئه‌ندام و شیره‌تكارێن لژنێ دوهی 22/11/2021 پێشوازی ل دكتۆره ڤالا فه‌رید، وه‌زیرا هه‌رێمێ بۆ كاروبارێن په‌رله‌مانی كر و د كۆمبوونه‌كێ دا هه‌ردو لایان دیتن و تێبینیێن خوه ل سه‌ر پرۆژه‌یاسایێ دیاركرن.
زیاد جه‌بار، سه‌رۆكێ لژنا دارایی و كاروبارێن ئابووری ل په‌رله‌مانێ كوردستانێ دیار كر، وان بڕیار دایه نڤیساره‌كێ ئاراسته‌ی سه‌رۆكاتیا په‌رله‌مانی بكه‌ن و تێدا داخوازا راپۆرتا چاڤدێریا دارایی یا سالا 2019 و 2020ێ بكه‌ن.
سه‌رۆكێ لژنا دارایی و كاروبارێن ئابووری ل په‌رله‌مانی ئاماژه ب وێ چه‌ندێ ژی كر كو د نڤیساره‌كێ دا دێ دوپاتی ل حوكمه‌تا هه‌رێما كوردستانێ هێته كرن كو پرۆژه‌یاسایا بودجا سالا 2022 بۆ په‌رله‌مانی بهێته هنارتن.
