رۆسیا نووترین هه‌لوه‌ستێ خوه ل دۆر رۆژئاڤایێ كوردستانێ ئاشكرا دكه‌ت
ئه‌ڤرۆ:
نوونه‌رێ تایبه‌ت یێ رۆسیا بۆ كاروبارێن سووریێ راگه‌هاند كو هه‌تا نها توركیا گه‌له‌ك سۆزێن خوه ل دۆر سووریێ و رۆژئاڤایێ كوردستانێ بجه نه‌ئیناینه لێ نها وان ل گه‌ل توركیا ده‌ست ب دانوستاندنان كرینه و دخوازن توركیا رۆله‌كا ئه‌رێنی بۆ پاشه‌رۆژا سووریێ بگێریت.
ئه‌لیكساندیر لاڤرینتیێڤ نوونه‌رێ تایبه‌ت یێ رۆسیا بۆ كاروبارێن سووریێ راگه‌هاند كو وه‌كو رۆسیا ئه‌و كار دكه‌ن دا ره‌وشا سووریێ ئارام بیت، چونكو ره‌وشا ئالۆز یا سووریێ كارتێكرنا خوه ل ده‌ڤه‌رێ كریه و دڤێت دوور ژ شه‌ری و ب رێیێن سیاسی قه‌یرانا نها ل سووریێ بهێته چاره‌سه‌ركرن و وان وه‌كو رۆسیا دڤێت هه‌موو هێزێن بیانی ژ سووریێ ده‌ركه‌ڤن دا خه‌لكێ سووریێ بخوه بریارێ ل دۆر پاشه‌رۆژا خوه بده‌ن و گۆت: (به‌ری نها مه داخواز ژ ئه‌مریكا ژی كریه كو هێزێن خوه ژ باكورێ سووریێ ڤه‌كێشیت، لێ هه‌تا نها هێزێن ئه‌مریكا ل سووریێ ماینه و هه‌روه‌سا كۆمبوونا لیژنا دستووری ژی بێی ئه‌نجام بوو و ئه‌و یه‌ك ژی رامانا هندێ دده‌ت كو بزاڤێن هه‌تا نها بۆ چاره‌سه‌ریا قه‌یرانا سووریێ هاتینه كرن نه‌گه‌هشتینه چو ئه‌نجامان و ژ به‌ر هندێ وه‌كو رۆسیا مه ده‌ست ب بزاڤه‌كا نوو كریه).
ناڤهاتی راگه‌هاند كو وان به‌ری نها داخواز ژ توركیا كربوون هێزێن خوه ژ ئدلبێ ڤه‌كێشیت لێ مخابن توركیا سۆزێن خوه بجه نه‌ئیناینه و هه‌بوونا گرۆپێن چه‌كدارێن سه‌ر ب توركیا ئاریشه‌كا گه‌له‌ك مه‌زنه و دڤێت توركیا چاره‌سه‌ریه‌كا گونجای بۆ وان په‌یدا بكه‌ت، چونكو هه‌تا گرۆپێن چه‌كدار ل سه‌ر ئاخا سووریێ بمینن ئه‌و گرۆپێن چه‌كدار ناهێلن كو ره‌وشا سووریێ ئارام بیت و گۆت: (باكورێ سووریێ ئانكۆ ده‌ڤه‌را كوردی بۆ مه ژی گه‌له‌ك گرنگه، به‌ری نها مه گه‌له‌ك بزاڤ كرن كو شام و كورد پرسێن د ناڤبه‌را خوه دا چاره‌سه‌ر بكه‌ن لێ هه‌تا نها دانوستاندنێن وان بێی ئه‌نجام بووینه و مه دڤێت جاره‌كا دی هه‌ر دو ئالی ده‌ست ب قۆناغه‌كا نوو بكه‌ن).
ل دۆر ئێرشێن توركیا یێن ل سه‌ر باكورێ سووریێ ژی ناڤهاتی راگه‌هاند كو به‌ری نها توركیا گه‌له‌ك سۆز دابوون و براستی ژی توركیا سۆزێن خوه ل دۆر ئارامیا ل باكورێ سووریێ بجه نه‌ئینایه و نها مه ل گه‌ل توركیا ده‌ست ب دانوستاندنان كریه و بێگومان مه دڤێت توركیا رۆله‌كا ئه‌رێنی بگێریت، ژ به‌ر هندێ ژی هه‌ڤدیتنێن مه ل گه‌ل توركیا به‌رده‌وامن و گۆت: (مه ل گه‌ل توركیا ژی ده‌ست ب قۆناغه‌كا نوو یا دانوستاندنان كریه، دڤێت رۆلێ توركیا یێ ئه‌رێنی بیت، نابیت توركیا ببیته پشكه‌ك ژ ئالۆزیێن نها ل سووریێ و ئه‌و یه‌ك ژ ئالیێ مه ڤه ب چو ره‌نگه‌كێ ناهێته قه‌بوولكرن).
ئه‌و یه‌ك د ده‌مه‌كێ دایه كو به‌ری چه‌ند رۆژان ئیلهام ئه‌حمه‌د هه‌ڤسه‌رۆكا جڤاتا سووریا دیموكرات ژی راگه‌هاند كو رۆسیا گه‌له‌ك بزاڤكرن دا كورد و شام ئاریشێن د ناڤبه‌را خوه دا چاره‌سه‌ر بكه‌ن، لێ مخابن بزاڤێن رۆسیا هه‌تا نها بێی ئه‌نجام بووینه، چونكو شام رازی نینه دانپێدانێ ب مافێن ره‌وا یێن گه‌لێ كورد بكه‌ت و شامێ دڤێت وه‌كو به‌ری سالا ٢٠١١ دیسان حوكمێ ل هه‌موو سووریێ بكه‌ت، ئه‌و یه‌ك ژی ژ ئالیێ كوردان و پێكهاتێن دی یێن سووریێ ڤه ناهێته قه‌بوولكرن، چونكو كوردان د شه‌رێ ل دژی داعشێ دا ب هزاران قوربانی داینه و ژ به‌ر هندێ ژی دڤێت كوردان رۆله‌كا كاریگه‌ر د ئاڤاكرنا سووریایه‌كا نوو دا هه‌بیت.
