پارێزگارێ دهۆكێ:نابیت بۆ به‌رهنگاریا گه‌نده‌لیێ و نه‌هێلانا زێده‌گاڤیان خه‌مساری بهێته كرن
ئه‌ڤرۆ:
ب سه‌رپه‌رشتیا د. عه‌لی ته‌ته‌ر، پارێزگارێ دهۆكێ دوهی 20/2/2022 كۆمبوونه‌كا به‌رفره‌ها كارگێری ل سه‌ر ئاستێ رێڤه‌به‌رێن گشتی و ده‌ڤه‌ردار و دام و ده‌زگه‌هێن ئێمناهیێ و رێڤه‌به‌ریێن خزمه‌تگوزاری ل پارێزگه‌هێ هاته ئه‌نجامدان.
پارێزگارێ دهۆكێ د كۆمبوونێ دا ب مه‌ره‌ما پتر خزمه‌تكرنا وه‌لاتیان ب وه‌كهه‌ڤی و دادپه‌روه‌ری د چارچوڤێ رێنمایێن حكومه‌تا هه‌رێما كوردستانێ دا، دوپاتی ل سه‌ر بجهئینانا یاسایێ ل پارێزگه‌ها دهۆكێ كر و گۆت: “دڤێت ل به‌رامبه‌ر هه‌ر سه‌رپێچی و زێده‌گاڤیه‌كێ پێرابوونێن یاسایی بهێنه وه‌رگرتن و بۆ به‌رهنگاریا گه‌نده‌لیێ و نه‌هێلانا ئه‌نجامدانا زێده‌گاڤی و سه‌رپێچیان نابیت خه‌مساری بهێته كرن، هیڤیدارین هه‌موو دام و ده‌زگه‌هێن په‌یوه‌ندیدار ئه‌ركێ خوه ئه‌نجام بده‌ن و باشتر خزمه‌تا وه‌لاتیان بكه‌ن”.
هه‌ر دكۆمبوونێ دا پارێزگارێ دهۆكێ گوهداریا بیر و بۆچوونێن به‌رهه‌ڤبوویان كر بۆ پتر هه‌ماهه‌نگی و لێك تێگه‌هشتنا كاری و كێمكرنا رۆتینێ د ناڤ دام و ده‌زگه‌هێن حكومی ل پارێزگه‌هێ هاته‌كرن.
دیسا هه‌ر دوهی 20/2/2022 د. عه‌لی ته‌ته‌ر، پارێزگارێ دهۆكێ سه‌را رێڤه‌به‌ریا ئاسایشا پارێزگه‌ها دهۆكێ دا و ژلایێ عه‌مید زێره‌ڤان به‌رۆشكی، رێڤه‌به‌رێ نوو یێ ئاسایشا پارێزگه‌هێ و پله‌دارێن رێڤه‌به‌ریێ پێشوازی لێ هاته كرن.
پارێزگارێ دهۆكێ بناڤێ خوه و كارگێریا پارێزگه‌هێ پیرۆزباهی ل عه‌مید زێره‌ڤان به‌رۆشكی، رێڤه‌به‌رێ نوو یێ ئاسایشا پارێزگه‌هێ كر و ته‌كه‌زی ل سه‌ر به‌رقراركرنا ئێمناهیا وه‌لاتیان ل ده‌ڤه‌رێ و بجهئینانا یاسایێ كر و پشته‌ڤانیا پارێزگه‌هێ بۆ هه‌ر هاریكاریه‌كێ دیار كر و هیڤیا سه‌ركه‌فتنێ بۆ خواست.
دیسا هه‌ر دوهی د. عه‌لی ته‌ته‌ر، پارێزگارێ دهۆكێ ب هه‌لكه‌فتا بۆرینا 69 سالان ل سه‌ر دامه‌زراندنا ئێكه‌تیا قوتابیێن كوردستانێ، سه‌را باره‌گایێ لقێ دهۆك یێ ئێكه‌تیا قوتابیێن كوردستانێ دا و ژلایێ عه‌لی حه‌سه‌ن، به‌رپرسێ لقێ دهۆك و پێشمان ره‌شید، به‌رپرسێ لقێ زانكۆ یێن ئێكه‌تیا قوتابیان و ئه‌ندامێن هه‌ردو لقان پێشوازی لێ هاته كرن.
پارێزگارێ دهۆكێ بناڤێ خوه و كارگێریا پارێزگه‌هێ رۆژا 18 شواتێ و 69سالیا دامه‌زراندنا ئێكه‌تیا قوتابیێن كوردستانێ ل هه‌موو ئه‌ندام و لایه‌نگرێن لقێ پیرۆز كر و سه‌ركه‌فتن بۆ هه‌موویان خواست و گۆت: “ڤێ رێكخراوێ ب ده‌هان سالان خه‌بات و تێكوشان كریه و چه‌ندین كادر و كه‌سانێن بسپۆر و شاره‌زا پێگه‌هاندینه و نوكه رۆلێ خوه د ناڤ دام و ده‌زگه‌هێن میری و حزبی و جه‌ماوه‌ری دا ب ئه‌رێنی دگێرن”.
