حنێرا پێشمه‌رگه‌كی
پشته‌ڤانیكرنا پێشمه‌رگه‌ی ئه‌ركێ هه‌موو گه‌لێ كورده و ب هه‌ر شێوازه‌كی بیت، من ژی دڤێت ب رێیا ڤێ نڤیسا كورت به‌حسێ چه‌ند دیمه‌نه‌كێن ئێك ژ داستانێن ڤێ دووماهیێ یێن پێشمه‌رگێ قاره‌مان بكه‌م و تێدا ئازاتیا فه‌رمانده‌كێ قاره‌مان بینم به‌رچاڤێن گه‌لێ خوه.
ل سپێده‌یا ئێكشه‌مبیا بووری ب جۆش و خرۆشه‌كا زێده ته‌ڤی چه‌ند هه‌ڤالان چوومه لایێ قه‌هره‌مانان ل به‌ره‌یێ ئاسكی مووسل ـ كه‌سكێ. ڕۆژه‌كا هه‌تاڤی بوو، كه‌سكاتیێ ڕوویه‌كی سحراوی دابوو وان به‌رزاهی و نزمی و گر و بانیان، هه‌ر كه‌سه‌ك مژوولی پێئكانینا ئه‌رك و خه‌باتا خوه بوو، ل هه‌ر ده‌رێ ساتر و كورك دهاتنه دروستكرن، شوونوارێن گولله و توپبارانكرن و شه‌ڕی ژی پشكه‌ك بوون ژ وی د یمه‌نێ سحراوی. به‌لێ تشتێ سه‌رنجا من ڕاكێشای پرا ئاسكی مووسل بوو، ب راستی یا فه‌رمانده‌كێ پێشمه‌رگه ل وێرێ ئه‌نجامدای حنێربوو!. داستانا رزگاركرنا ئاسكی مووسل و گرتنا دۆریانا كه‌سكێ ـ مووسل و دیمه‌نێن ژناڤبرنا ترومبێلێن مینرێژكری ب چه‌كێ میلانۆ و دیسان دیمه‌نێ به‌رسنگرتنا ئێك ژ ترومبێلێن تیئێنتیكری ژ لایێ پێشمه‌رگه‌كێ ب جه‌رگ و دلسۆز كو ب ده‌بابا خوه چو و خوه ل پێشیا وێدا و نه‌هشت بگه‌هیته ناڤا هه‌ڤالێن وی، ب رێیا تێله‌ڤزیۆنان ببوونه جهێ دلخۆشیا هه‌موو خه‌لكێ كوردستانێ و زۆربه‌یا ڕاگه‌هاندنا جیهانی ژی به‌حسا وان دكر و ئه‌و دیمه‌نه ب فلمێن سینه‌مائی یێن ئه‌مریكی ددانه ساخله‌تدان.
هێرشا گرتنا دوریانا كه‌سكێ ژ چار قوولانڤه بوو، ته‌وه‌رێ هه‌ری ب هێز و هه‌ری ب ئاسته‌نگ ته‌وه‌رێ ئاسكی مووسل بوو. گه‌له‌ك یا قورسه بۆ له‌شكری ڕووباره‌ك ل پێشیا وی بیت و ڕێیا تێپه‌ربوونێ نه‌بیت. چونكو قه‌له‌ره‌شێن داعشێ پرا ئاسكی مووسل ته‌قاندبوو، ئه‌ركێ پێشمه‌رگه‌ی ژی قورستر ببوو و سه‌ركه‌فتنا پێشمه‌رگه‌ی ل سه‌ر دیوارێ مه‌رگی بوو و گرێدایێ تێپه‌ربوونا ژ وی ڕووباری بوو. به‌لێ فه‌رماندنێ پێشمه‌رگه‌ی یێ وی ته‌وه‌ری هه‌ر تشت خواندبوو و حساب بۆ هه‌ر مه‌ترسیه‌ك و هه‌ر ئاسته‌نگه‌كێ كربوو. كێ دیتیه د ناڤا ئاگری و بارانا گولله‌یان و توپبارانكرنا دوژمنی دا پره‌ك ل سه‌ر ڕووباره‌كی ب شێوه‌ك موكم و ڕێكوپێك د كێمترین ده‌مدا بهێته دانان؟! ب راستی حنێره؟ چاوا دبیت؟
عه‌مید ئه‌سكه‌نده‌ر حاجی بانی كو ئێك ژ فه‌رماندێن پێشمه‌رگێ كوردستانێ یه، سه‌ر ب زێره‌ڤانی ڤه، قاره‌مانێ حنێرێ بوو ده‌مێ هزرا هه‌ر پێشهاته‌كێ كربوو، هه‌تا وی ڕاده‌ی دو بارهه‌لگرێن تژی حه‌سۆ و تێكهه‌له‌ی ل گه‌ل شه‌فه‌له‌َك و حه‌فاره‌كێ ته‌ڤی هێزا خوه بربوون. ده‌مێ هێزا پێشمه‌رگه‌ی ب تانك و زریپۆشێن خوه ڤه دگه‌هیته په‌رێ ڕووباری دبینیت تێپه‌ربوون مه‌حاله، به‌لێ ئێكسه‌ر فه‌رماندێ ناڤبری ژ ترومبێلا له‌شكری دادكه‌ڤیت و قه‌ستا ڤی ئالی و وی ئالێ پرا شكه‌ستی دكه‌ت، هه‌ر چه‌نده نیشانشكێن دوژمنی وه‌كی بارانێ گولله ل پێشمه‌رگه‌ی دباراندن، به‌لێ فه‌رماندێ قاره‌مان رانه‌وه‌ستیا و گازی بارهه‌لگرانكر و ده‌ستدا دروستكرنا پرا خوه، پشتی تێكه‌له به‌ردایه د رووباری دا، ژ بۆ سڤككرنا گفاشا گولله‌یێن دوژمنی ب رێیا ده‌ڤێ حه‌فارێ دو هه‌مه‌ر هاڤێتنه لایێ دی یێ رووباری. به‌لێ فه‌رماندێ ئازا و كارزان ئه‌ڤ جاره لووله‌یێن ئاڤێ (بۆری) و هه‌موو تشته‌كێ پێدڤی بۆ دروستكرنا پره‌كێ ل گه‌ل خوه بربوون و به‌رده‌وامبوو ل سه‌ر دانانا وێ. پشتی كاره‌كێ ب له‌رز و به‌ز و پری مه‌ترسی و ل گه‌ل بارینا گه‌لله و تۆپێن دوژمنی، فه‌رماندێ ئازا ب هاریكاریا پێشمه‌رگان پرا خوه تماماكر و كاروانێ ترومبێلێن له‌شكری ژ ڕووباری ده‌ربازبوو و قه‌ستا ئاسكی مووسل كرن. دانانا پره‌كێ ل سه‌ر رووباره‌كی چه‌ندا ساده ژی بیت، د ده‌مێن شه‌ڕی دا، و چ شه‌ڕه‌ك؟ شه‌ڕێ هه‌مبه‌ری مه‌ترسیدارترین هێزا تیرۆری و خوه‌كوژی ل جیهانێ! ب راستی ژی حنێره!!. دڤێت ئه‌ڤ قاره‌مانیه ببنه دیرۆك و ببنه فلمێن سینه‌مایی.
چه‌ند هه‌سته‌كێ خۆش بوو د ناڤا پێشمه‌رگێن قاره‌مان و چاڤنه‌ترس دا، ل سه‌ر ئێك ژ بانیێن ده‌ڤه‌را ئاسكی مووسل كو دكه‌فته هنداڤی دوریانا كه‌سكێ ـ مووسل ئه‌م بووینه مێهڤانێن كۆمه‌كا ئه‌لهۆیێن پێشمه‌رگه. چه‌ند ئاخفتن و گه‌نگه‌شه مه كرن، به‌لێ گۆتنه‌كا فه‌رماندێ ناڤبری بۆ وێ كۆما پێشمه‌رگه‌ی ل بیرا منه كو دگۆتێ: “ئه‌ڤ جه‌نگه بۆ مه كوردان وه‌ك ئه‌زموونا ویزاریه” ئانكو ئه‌و شۆرش و خه‌بات و قوربانیدان و كێمیا باران و ده‌رده‌سه‌ری و زولم و زۆری یا لێراست هاتین، ئه‌ڤرۆ هه‌كه د ڤی شه‌ڕی دا بسه‌ركه‌تین و ئه‌نجامێن باش بده‌ستخستن بێ دو دلی دێ گه‌هینه ئارمانجا خوه و دێ بینه ده‌وله‌ت. ب بهیستنا ڤێ ئاخفتنێ دلێ من ژی ته‌ڤی یێ پێشمه‌رگان بۆ ئاگر.
د رێكا ڤه‌گه‌ریانێ دا، ئه‌م چووینه د ناڤا باژێركێ ئاسكی مووسل دا، فه‌رماندێ ناڤبری به‌ر ب خانیه‌كێ ڤه‌ده‌ر ژ خانی و ئاڤاهیێن دی چوو، خانیه‌ك بێ سه‌روبه‌ر بوو و نیڤا وی هێشتا كاڤل بوو. دگۆتن ئه‌ڤه خانیێ ئه‌میرێ داعش یێ ئاسكی ـ موسل بوو. ژبۆ مه‌ره‌ق بچم وی خانی ببینم، من قه‌ستكرێ و شوونوارێن وی ئه‌میرێ كووچك دیتن، ب راستی ژی مالا وی وه‌ك یا كووچكان بوو. ل حه‌وشا وی كۆمه‌كا حه‌بك و ده‌رمانان كه‌تبوون سه‌ر ئه‌رد، من ژی ڤیا تشته‌كی وه‌ك بیرهاتن ژ مالا كووچكێ داعش راكه‌م. قالكه‌كا حه‌بێن ئه‌مریكی ژ جۆرێن باش یێن هانده‌ر ژ بۆ خورتكرنا ئه‌ركێن مێشكی و موكمكرنا هشێن مرۆڤی یا وی ئه‌میرێ كووچك یێ (ده‌وله‌تا ئیسلامی) من راكر و د گه‌ل خوه ئینا وه‌ك بیرهاتن.
