عه‌لی ته‌ته‌ر: ئه‌مریكا داخوازا بجهئینانا رێككه‌فتنا شنگالێ دكه‌ت
ئه‌ڤرۆ:
د چارچۆڤێ سه‌ره‌دانه‌كا شاندێ پارێزگه‌ها دهۆكێ ب سه‌رۆكایه‌تیا عه‌لی ته‌ته‌ر پارێزگه‌رێ دهۆكێ بۆ ئه‌مریكا و دیدارێن وی شاندی ل گه‌ل به‌رپرسێن ئه‌مریكی، پارێزگه‌رێ دهۆكێ راگه‌هاند، به‌رپرسێن ئه‌مریكا پشته‌ڤانیا خوه بۆ هه‌رێما كوردستانێ دووپاتكر.
عه‌لی ته‌ته‌ر، پارێزگه‌رێ دهۆكێ گۆت، به‌رپرسێن ئیدارا ئه‌مریكی راسپاردێن باش بۆ خه‌لك و حوكمه‌ت و ئالیێن سیاسی یێن كوردستانێ هه‌بوون، داخوازكر د ئێك ده‌نگ و ئێك هه‌لویست بن و ل به‌غدا پشكداریێ د پرۆسا سیاسی دا بكه‌ن.
پارێزگه‌رێ دهۆكێ گۆت ژی” ئه‌مریكا داخوازێ ژ كوردان دكه‌ت ئێك ده‌نگ بن و نه‌هێلن په‌رت و به‌لاڤی د ناڤبه‌را ئالیێن سیاسی دا هه‌بیت، نوونه‌رێ كۆچكا سپی ب شاندێ حوكمه‌تا هه‌رێما كوردستانێ راگه‌هاند، سلاڤێن جۆ بایدن، سه‌رۆكێ ئه‌مریكا ب سه‌ركردایه‌تیا سیاسی یا كوردی ب تایبه‌ت سه‌رۆك مه‌سعود بارزانی بگه‌هینن”.
عه‌لی ته‌ته‌ر ئه‌وژی به‌رچاڤكر، بۆ وێ چه‌ندێ سه‌قامگیری بۆ شنگالێ بزڤریت و خه‌لك ڤه‌گه‌ریته سه‌ر مال و حالێ خوه، ئه‌مریكا دووپاتیێ ل بجهئینانا رێككه‌فتنا شنگالێ دكه‌ت، ئه‌و هێز و ئالیێن سیاسی و چه‌كدارێ یێن نه قانوونی كو ل قه‌زا شنگالێ نه، بچنه ده‌رڤه شنگالێ”.
ژ ئالیه‌كی دی ڤه، رۆبینا عه‌زیز، نوونه‌را پێكهاتێ كلدوئاشووری ل پارێزگه‌ها دهۆكێ كو دگه‌ل شاندێ پارێزگه‌ها دهۆێ یه ل ئه‌مریكایه گۆت” به‌رپرسێن ئه‌مریكی داخواز دكه‌ن هه‌لبژارتن ل هه‌رێما كوردستانێ ل ده‌مێ خوه دا ل ئێكێ چریا ئێكێ 2022 بهێنه ئه‌نجامدان”.
نوونه‌را پێكهاتێ كلدوئاشووری ل پارێزگه‌ها دهۆكێ گۆت ژی” هنده‌ك ئالی دخوازن كورسیێن پێكهاتێن كلدانی و ئاشووری كێم بكه‌ن و ئه‌م ژی ب ڤێ چه‌ندێ رازی نابین”.
دهێته زانین ل رۆژا 1/10/2020 رێككه‌فتنا شنگالێ د ناڤبه‌را حوكمه‌تا هه‌رێما كوردستانێ و حوكمه‌تا به‌غدا هاتبوو ئیمزاكرن، هه‌تا نوكه ژی ئه‌و ئالی و حزبێن نه قانوونی كو ل شنگالێ نه رێ ل به‌رده‌م بجهئینانا وێ رێككه‌فتنێ ناده‌ن، بۆ وێ چه‌ندێ خه‌لكێ وان ده‌ڤه‌ران بزڤرن سه‌ر مال و حالێ خوه.
