هه‌ناسیه‌یێن (نایف مه‌حمود) دێ مه به‌ره‌ڤ كیڤه به‌ن؟!
عبدالرحمن بامه‌رنی
هه‌ناسه‌ییا هیڤیان ئێك ژ شعرێن هه‌لبه‌ستڤانێ گه‌نج (نایف مه‌حمود)ه، ل رۆژناما ئه‌ڤرو ژماره 3155 ل رۆژا 7/6/2022ێ هاتیه بلاڤكرن و شعر ب خوه ژ كویراتییا هه‌ستێن گه‌نجه‌كی ده‌ردكه‌ڤیت، به‌رامبه‌ر نه‌ته‌وه‌یێ وی و حه‌ز و خوه‌زیێن وی ژ خه‌ونێن وی ده‌رباس دبن، سه‌ره‌رای دیرۆكه‌كا خویناوی و پری ئێش و ژان. لێ گه‌نجه‌كێ تژی به‌ر چچكێن وی هیڤی و ئومێد و نه‌ڤێت د خه‌ونێن نه‌خوه‌ش دا، د بێ ئومێدیێ دا بژیت و دهێت ڤان ده‌ردان وه‌ك كولكه‌كا تژی عه‌داڤ بووی دناڤا شعره‌كێ دا ده‌ردكه‌ت، ئها ئه‌ڤا من ژ ڤێ شعرێ دڤێت و ڤێ نڤیسینا كورت به‌رامبه‌ر شعره‌كا تژی واته و هیڤی ئه‌ڤه‌یه، ئه‌م چاوان ب گه‌شبینی ل ئایندێ خوه بنێرین و چاوان نه‌هێلین تارمایێ بۆریێ مه یێ نه‌خوه‌ش كارتێكرنێ ل ئایندێ مه بكه‌ت، كو د نوكه و سه‌رده‌مێ نوكه دا، جوداتر ژ سالێن ده‌رباس بووی و تایبه‌ت ل چه‌رخێن بۆری، ب تنێ به‌رێخوه‌دان تشته‌كێ كلاسیك بوو و نوكه دو پێنگاڤا به‌ره‌ڤ پێشه، ئه‌گه‌ر ئه‌م پێشكه‌فتن و ته‌كنه‌لوژیایێ و جیهانگیرییا دنیا كریه گونده‌كێ بچویك، بكه‌ینه دخزمه‌تا ڤێ نڤیسینێ دا و بكه‌ینه پیڤه‌ر.
هوزانڤان ل ده‌ستپێكا شعرا خوه بڤی كوپله‌ی مه یێ خوانده‌ڤان رادكێشیته ناڤ شعرا خوه، ده‌ما دبێژیت:
ئێش و ژانێن وه‌لاتێ من
ل سه‌ر ده‌فته‌را دیرۆكێ
خوین و برین ژێ دبارن..
تویه‌كێ گه‌نج و ل به‌رامبه‌ری جیهانبینیا ئه‌ڤرۆ، ل به‌رده‌م دو رێ كایی یان دناڤ ده‌فته‌را دیروكێ دا به‌رزه ببی، ئه‌و دیرۆكا هوزانڤانی ب ده‌فته‌ره‌كا تژی خوین و برین ناڤكری یان ژی دڤێت ل به‌ر خوه بده‌ی و یێ گه‌شبین بی و دیتنا ته بۆ به‌ره‌ڤ پێش بیت، وه‌ك ڤی كوپلێ شعری:
جاره‌كا دی
بێده‌را مه دهێته به‌ر به‌رێ دستاری
گه‌نم و ئاری
ئالا و ده‌وله‌ت
سروودا مزگینیا دئینیت.
یا من دڤێت دڤێ شعرێ دا ل سه‌ر راوه‌ستم، گه‌نجێن مه چ بكه‌ن، كو مه دڤێ پێشكه‌فتنێ و ڤی سه‌رده‌می دا تاكه هیڤی ب وانه، ئه‌و دشێن مه قورتال بكه‌ن، ژبه‌ركو ته‌مه‌نێ مه رێ نا ده‌ته مه ئه‌م خوه دگه‌ل جیهانا نوی و جیهانا سۆشیال میدیایێ و تیكتۆكێ بگونجینین و ئایا، خه‌ونێن وی، حه‌زێن وی و دنیابینیا وی دێ چ بن؟ ئایا دێ ته‌مامكرنا قوربانیدان و زیندان و ئه‌شكه‌نجه‌دان و ئه‌نفال و كیمیابارانكرن بیت یان ژی دێ ده‌ستان ژڤانه هه‌میان به‌رده‌ت، ل دویڤ خه‌وێن ده‌ستكرد چیت؟ ئه‌ڤا جیهانێ سنوور نه‌هێلاین و جیهان پێكڤه گرێدای و كریه گونده‌كێ بچووك!
یا من دڤێت بكه‌مه پرسیار ژی، ئه‌گه‌ر گه‌نجێن مه ل دویڤ خه‌وێن نوكه و یێن سه‌رده‌م چوو و وه‌ك هه‌رجار دیرۆكێ خوه دوباره‌كره‌ڤه و وه‌ك چاوان ب ناڤێ ئاینی و بناڤێ داگیركاریێ و كویلاتیێ خه‌ونێن خوه بن ئاخكرین، دێ ئه‌و ژی وه كه‌ت، یان دێ به‌رده‌وامیێ ده‌ته رێبازێ؟! هه‌ر چه‌نده دڤێ شعرێ دا خه‌ونێن هوزنڤانی و دنیابینیا وی ب تنێ كوردستانه و هشیاركرنا ملله‌تی یه، لێ ئه‌ڤ نموونه ب تنێ به‌س نینه، كو نڤیسینا خوه ئاراسته‌ی گه‌نجێن دی بكه‌ین، ئه‌ڤێن ڤێ هزرێ نه‌كه‌ن و د حه‌ز و خه‌وێن خوه دا به‌رده‌وام.
