سه‌رۆكێ حوكمه‌تێ 800 ملیۆن دینار بۆ به‌رهنگاریا كۆلێرایێ مه‌زاختن
ئه‌ڤرۆ:
مه‌سرور بارزانی، سه‌رۆكێ حوكمه‌تا هه‌رێما كوردستانێ ل ره‌وشا نه‌خۆشێن زكچوون و كۆلێرایێ دپرسیت و وه‌زیرێ ساخله‌میێ رادسپێریت بۆ دووڤچوونا ره‌وشا نه‌خۆشان و گرتنه‌به‌را رێكارێن توند بۆ به‌رهنگاری و كۆنترۆلكرنا نه‌خۆشێن زكچوون و كۆلیرَایێ، دیسا پشته‌ڤانیا خوه و حوكمه‌تا هه‌رێما كوردستانێ بۆ هه‌ر پێدڤیه‌كێ دیار كر، ژ پێخه‌مه‌ت به‌ڕژه‌وه‌ندی و سلامه‌تیا وه‌لاتیان.
دیسا هه‌ر ب مه‌ره‌ما به‌رهنگاری و كۆنترۆلكرنا نه‌خۆشێن زكچوون و كۆلیرَایێ، سه‌رۆكێ حوكمه‌تا هه‌رێما كوردستانێ رازیبوون ل سه‌ر مه‌زاختنا گوژمێ 800 ملیۆن دیناران دا، وه‌كو بودجه‌یا هه‌وارهاتنا بله‌ز بۆ كۆنترۆلكرنا نه‌خۆشێن زكچوون و كۆلێرایێ ل پارێزگه‌ها سلێمانیێ.
سه‌رۆكێ حوكمه‌تێ به‌رهه‌ڤی و پشته‌ڤانیا خوه بۆ هه‌ر پێدڤیه‌كێ بۆ رێگریكرنێ ل به‌لاڤبوونا نه‌خۆشیا كۆلێرایێ دیار كر.
حه‌مزه ره‌زیكی، به‌رپرسێ راگه‌هاندنا رێڤه‌به‌ریا گشتی یا ساخله‌میا پارێزگه‌ها دهۆكێ بۆ رۆژناما ئه‌ڤرۆ دیار كر، ل دهۆكێ هه‌تا نوكه ره‌وش د بن كۆنترۆلێ دایه و چو نه‌خۆشێن كۆلێرایێ نه‌هاتینه تۆماركرن و گۆت: “لژنا بلند یا به‌رهنگاریا كۆلێرایێ ل پارێزگه‌ها دهۆكێ بڕیار دایه، كه‌سكاتی ب هه‌موو جۆرێن خوه‌ڤه ل خوارنگه‌ه و كافیتریا بهێته قه‌ده‌غه‌كرن، دیسا په‌یالێن شووشه‌ی هاتنه قه‌ده‌غه‌كرن و ل شوونا وان یێن سه‌فه‌ری بهێنه بكارئینان”.
