له‌شكرێ سووریێ ل رۆژئاڤایێ كوردستانێ بجه بوویه و وه‌لاتیێن كورد دلگرانن
ئه‌ڤرۆ، هۆشه‌نگ تاجر:
له‌شكرێ سووریێ ب چه‌كێ گران ل پڕانیا ده‌ڤه‌رێن رۆژئاڤایێ كوردستانێ بجه بوویه و فه‌رمانداره‌كێ هێزێن سووریا دیموكرات ژی دیار دكه‌ت كو ژ بلی رێككه‌فتنا ل گه‌ل رژێما به‌شاری وان چو رێیێن دی نه‌بوون و ل ئالیێ دی وه‌لاتیێن كورد ل رۆژئاڤایێ كوردستانێ ژ هاتنا له‌شكرێ سووریێ دلگرانن.
حه‌یده‌ر ره‌شید چاڤدێرێ سیاسی یێ رۆژئاڤایێ كوردستانێ بۆ ئه‌ڤرۆ دیار كر كو پشتی رێككه‌فتنا هه‌سه‌دێ و رژێما سووریێ نها له‌شكرێ سووریێ ل پڕانیا ده‌ڤه‌رێن رۆژئاڤایێ كوردستانێ بجه بوویه و چه‌ند رۆژن ژی له‌شكرێ سووریێ سه‌نگه‌رێن نوو دروست دكه‌ن و چه‌كێن گران ژی ل گه‌له‌ك ده‌ڤه‌ران بجه كرینه و گۆت: (وه‌كو وه‌لاتیێن كورد یێن رۆژئاڤایێ كوردستانێ ئه‌م ژ هاتنا له‌شكرێ سووریێ دلگرانین، چونكی هه‌تا نها ژی رژێما سووریێ دانپێدان ب مافێن ره‌وا یێن گه‌لێ كورد ل سووریێ نه‌كریه و هه‌روه‌سا رۆژانه به‌رپرسێن شامێ دبێژن دڤێت جاره‌كا دی ئه‌و حوكمێ ل هه‌موو سووریێ بكه‌ن، د ره‌وشه‌كا وه‌سا دا هاتنا له‌شكرێ سووریێ بێگومان دێ مه‌ترسیێن خوه یێن مه‌زن بۆ رۆژئاڤایێ كوردستانێ هه‌بیت، چونكی نابیت ژ به‌ر توركیا كورد ل سووریێ ببنه قوربانی و جاره‌كا دی بكه‌ڤنه ژێر كۆنترۆلا رژێما به‌شاری ئه‌و یه‌ك ب چو ره‌نگه‌كێ ناهێته قه‌بوولكرن).
ل ئالیێ دی فه‌رمانداره‌كێ هێزێن سووریا دیموكرات ژی بۆ ده‌زگه‌هێن راگه‌هاندنێ یێن سه‌ر ب رێڤه‌به‌ریا خوه‌سه‌ر راگه‌هاند كو ژ بلی رێككه‌فتنا ل گه‌ل شامێ چو رێیێن دی نه‌بوون و ئه‌و نه‌چار بوون كو ل گه‌ل شامێ رێككه‌فتنه‌كا سه‌ربازی ئیمزا بكه‌ن، رێككه‌فتنا نها یا د ناڤبه‌را هه‌سه‌دێ و شامێ دا رێككه‌فتنه‌كا سه‌ربازی یه و رۆسیا ژی چاڤدێریا رێككه‌فتنێ دكه‌ت و ئارمانجا سه‌ره‌كی یا رێككه‌فتنا هه‌سه‌دێ و شامێ ژی بۆ هندێ یه دا نه‌هێلن توركیا ئاخا سووریێ داگیر بكه‌ت.
هه‌مان فه‌رمانداری كو ناڤێ وی نه‌هاتیه ئاشكرا كرن ئه‌و یه‌ك ژی دیار كریه كو گه‌له‌ك پرسێن مه‌زن د ناڤبه‌را رێڤه‌به‌ریا خوه‌سه‌ر و شامێ دا هه‌نه كو دڤێت ب رێیێن سیاسی بهێنه چاره‌سه‌ركرن، لێ رێككه‌فتنا نها هاتیه كرن تنێ سه‌ربازی یه و ئارمانجا رێككه‌فتنێ ژی ئه‌وه دا رۆژئاڤایێ كوردستانێ ژ ئێرشه‌كا نوو یا توركیا بهێته پاراستن.
چاڤدێرێن سیاسی ژی دیار دكه‌ن كو ئه‌مریكا ژ ره‌وشا نها ل رۆژئاڤایێ كوردستانێ دلگرانه، ب تایبه‌تی ژی به‌ری چه‌ند رۆژان ئه‌مریكا هۆشداری دا هێزێن سووریا دیموكرات كو هاتنا له‌شكرێ سووریێ بۆ رۆژئاڤایێ كوردستانێ دێ بیته ئه‌گه‌رێ ئالۆزیێن نوو ل ده‌ڤه‌رێ و دڤێت هێزێن سووریا دیموكرات خوه ژ كاره‌كێ وه‌سا دوور بكه‌ت.
ئه‌و یه‌ك د ده‌مه‌كێ دایه كو به‌ری چه‌ند رۆژان مه‌زلوم عه‌بدی فه‌رماندارێ گشتی یێ هێزێن سووریا دیموكرات ژی راگه‌هاند كو وان به‌ری نها گه‌له‌ك جاران داخواز ژ ئه‌مریكا كربوون كو نه‌هێلیت توركیا ده‌ست ب ئۆپه‌راسیۆنه‌كا نوو ل رۆژئاڤایێ كوردستانێ بكه‌ت لێ مخابن هه‌لوه‌ستێ ئه‌مریكا گه‌له‌ك لاواز بوو و ژ به‌ر هندێ ژی ئه‌و نه‌چار بووینه كو ب چاڤدێریا رۆسیا رێككه‌فتنه‌كێ ل گه‌ل شامێ بكه‌ن دا له‌شكرێ سووریێ ژی ل گه‌ل هێزێن وان پێكڤه به‌رگریێ ل ئاخا سووریێ و رۆژئاڤایێ كوردستانێ بكه‌ن.
ئه‌ڤ داخۆیانیا فه‌رماندارێ گشتی یێ هه‌سه‌دێ د ده‌مه‌كێ دایه كو وه‌لاتیێن كورد یێن رۆژئاڤایێ كوردستانێ ژ هاتنا له‌شكرێ سووریێ دلگرانن و وه‌سا دبینن ئێدی له‌شكرێ سووریێ دێ مینن و ئه‌و یه‌ك ژی دێ بیته مه‌ترسیه‌كا گه‌له‌ك مه‌زن ل سه‌ر پاشه‌رۆژا رۆژئاڤایێ كوردستانێ.
