مه‌سرور بارزانی: پارتی بۆ ئێك ده‌مژمێرێ ژی داگیران ژ مافێن خه‌لكێ كوردستانێ نه‌كریه و ناكه‌ت ژی
ئه‌ڤرۆ:
سه‌رۆكێ حوكمه‌تا هه‌رێما كوردستانێ، مه‌سرور بارزانی، ب هه‌لكه‌فتا 76 سالیا دامه‌زراندنا پارتی دیموكراتی كوردستان و رۆژا ژ دایكبوونا سه‌رۆك بارزانی، په‌یامه‌ك به‌لاڤكر و راگه‌هاند، د قۆناغێن جودا یێن خه‌باتا پارتیدا، سه‌ره‌رای هه‌موو گه‌ف و پیلانێن دوژمنان و نه‌حه‌زان و رۆژێن دژوار یێن به‌رگریێ، پارتی بۆ ئێك ده‌مژمێر ژی، داگیران ژ مافێن خه‌لكێ كوردستانێ نه‌كریه و ناكه‌ت.
ده‌قێ په‌یاما مه‌سرور بارزانی سه‌رۆكێ حوكمه‌تا هه‌رێما كوردستانێ…
ب هه‌لكه‌فتا 76 سالیا دامه‌زراندنا پارتی دیموكراتی كوردستان و رۆژا ژ دایكبوونا جه‌نابێ سه‌رۆك بارزانی، پیرۆزباهیه‌كا گه‌رم ئاراسته‌ی جه‌نابێ سه‌رۆكی و سه‌ركردایه‌تیێ وئه‌ندام و لایه‌نگر و دۆستێن پارتی دیموكراتی كوردستان دكه‌م. هیڤیدارم پارتی به‌رده‌وام د پێشكه‌فتن و پێشه‌نگایه‌تیێدا بیت.
76 ساله پارتی دیموكراتی كوردستان، وه‌كو حزب و بزاڤه‌كا جه‌ماوه‌ری و كوردستانی، پێ راوه‌ستیان و دابران، رێبه‌ریا بزاڤا رزگاریخوازا كوردستانێ دكه‌ت و هه‌تا نوكه ژی یا به‌رده‌وامه د خه‌بات و تێكۆشانێدا ژ پێخه‌مه‌ت ده‌سته‌به‌ركرنا مافێن نه‌ته‌وی و نیشتمانی و پاراستنا ده‌ستكه‌فتێن گه‌لێ كوردستانێ.
ل قۆناغێن جودا یێن خه‌بات و تێكۆشانا پارتیدا، سه‌ره‌رای هه‌موو گه‌ف و پیلانێن دوژمنان و نه‌حه‌زان و رۆژێن دژوار یێن به‌رگریێ دا، پارتی هه‌تا بۆ ئێك ده‌مژمێر ژی، دیگیران ژ مافێن خه‌لكێ كوردستانێ نه‌كریه و ناكه‌ت و هه‌ر ده‌مه‌كی ژی گه‌فه‌ك بۆ سه‌ر كوردستانێ هه‌بیت، پارتی وه‌كو به‌رده‌وام، د سه‌نگه‌رێ به‌راهیێ یێ به‌رگریێ و داكۆكیكرنێ یه ژ شكۆیا كوردستانێ. له‌وما ئه‌ندامێن پارتی، شانازیێ دكه‌ن و د سه‌ربلندن، كو خودانێن حزبه‌كا نیشتمانی و رێبه‌ر و سه‌رۆكه‌كی نه كو به‌رده‌وام ل سه‌نگه‌رێن به‌راهیێ یه ل گه‌ل پێشمه‌رگێن قه‌هره‌مان بۆ به‌رگریكرنێ و به‌رز راگرتنا شكۆیا خه‌لكێ كوردستانێ.
شانازیه‌كا دی یا دیرۆكا پر شكۆ یا پارتی وه‌كو حزبه‌كا كوردستانی، ئه‌وه كو به‌رده‌وام به‌رگریێ ژ مافێن مرۆڤی و مافێن هه‌موو پێكهاته‌یێن نه‌ته‌وی و ئایینی یێن جودا ل كوردستانێ دكه‌ت و به‌رده‌وام، پارێزه‌را مافێن هه‌موو ته‌خ و چین و پێكهاته‌یێن كوردستانێ یه. ژ پێخه‌مه‌ت ڤێ چه‌ندێ ژی، پارتی به‌رده‌وام كار دكه‌ت ژ پێخه‌مه‌ت پێشڤه‌برنا كولتوورێ پێكڤه‌ژیانا ئاشتیانه و كووركرنا فه‌رهه‌نگا لێبۆرینێ ل كوردستانێ.
ل سالیادا دامه‌زراندنا پارتیدا، سلاڤ ل دامه‌زرێنه‌رێ پارتی و رێبه‌رێ مه یێ نیشتمانی مسته‌فا بارزانیێ نه‌مر و كاك ئدریسێ هه‌رده‌م زیندی و هه‌موو شه‌هیدێن كوردستانێ.
