جڤاتا دادوه‌ریێ: ئێدی بڕیارێن دادگه‌هێن هه‌رێمێ ب كوردی دێ هێنه نڤیسین
ئه‌ڤرۆ:
ب مه‌ره‌ما ئێكخستنا زمانێ دادگه‌هان، جڤاتا دادوه‌ری یا هه‌رێما كوردستانێ بڕیار دا ئێدی ل هه‌موو دادگه‌هێن هه‌رێما كوردستانێ بڕیارێن دادگه‌هان ب كوردی بهێنه نڤیسین.
جڤاتا دادوه‌ریا هه‌رێما كوردستانێ دوهی 10/10/2022 راگه‌هاندنه‌ك به‌لاڤ كر و تێدا هاتیه: جڤاتا دادوه‌ری یا هه‌رێما كوردستانێ پشتی كۆمبوونا خوه یا رۆژا 26/9/2022ێ پشتبه‌ستن ب مادده‌یێ شه‌ش ژ قانوونا هه‌ژماره 23ێ یا سالا 2007ێ یا ده‌ستهه‌لاتا دادوه‌ری هه‌روه‌سا (مادده‌یێ شه‌ش یێ قانوونا هه‌ژماره شه‌ش یا سالا 2014)ێ یا زمانێن فه‌رمی ل هه‌رێما كوردستانێ، بڕیار دا (نڤیسینا بڕیارێن دادگه‌هان و هه‌موو ئه‌وان رێكارێن دادوه‌ری یێن ژ لایێ دادگه‌هێن كوردستانێ ڤه دهێنه په‌یره‌وكرن ب زمانێ كوردی بن، ب تنێ ل ده‌مێن پێدڤی زمانێ عه‌ره‌بی بهێته بكارئینان).
ئاماژه ب هندێ ژی هاتیه كرن كو ئه‌ڤ بڕیارا جڤاتا دادوه‌ری پشتی زنجیره‌یه‌كا كۆمبوونێن هه‌ڤپشك د ناڤبه‌را جڤاتا دادوه‌ری و په‌رله‌مان و ده‌سته‌یا ده‌ستپاكیێ و ئه‌كادیمیا كوردی دا بوو، كو ژ بلی ده‌ركرنا ئه‌ڤێ بڕیارێ، لایه‌نێن ناڤبری مژوولی ئاماده‌كرنا فه‌رهه‌نگه‌كا قانوونی یا ئێكگرتی یا كوردینه، بۆ ئێكخستنا زمان و ده‌سته‌واژه‌یێن قانوونی، كو ب سه‌رپه‌رشتیا جڤاتا دادوه‌ری و نوونه‌رایه‌تیا هه‌ر ئێك ژ په‌رله‌مان و وه‌زاره‌تا داد و ده‌سته‌یا ده‌ستپاكی و ئه‌كادیمیا كوردی ب رێڤه دچیت.
