پڕۆژه‌یێ پشته‌ڤانیكرنا ده‌لیڤێن كارێ بۆ گه‌نجان هاته راگه‌هاندن
ئه‌ڤرۆ:
ب ئاماده‌بوونا نوونه‌رێ پارێزگارێ دهۆكێ پڕۆژه‌یێ پشته‌ڤانیكرنا گه‌نجان ژ بۆ ب ده‌ستڤه‌ئینانا ده‌لیڤێن كاری و ژیانێ ب رێیا ئابوورێ دیجیتالی بۆ 250 گه‌نجان هاته راگه‌هاندن.
دوهی 13/12/2022 ل هولا كۆنفرانسێن زانكۆیا پولیته‌كنیكی یا دهۆك ب ئاماده‌بوونا ماجد سه‌ید سالح، نوونه‌رێ پارێزگارێ دهۆكێ و دكتۆره ئاری عادل، سه‌رۆكا زانكۆیا پولیته‌كنیك و هه‌ژماره‌كا به‌رپرسێن دام و ده‌زگه‌هێن حكومی و مامۆستا و قوتابی و نوونه‌رێن رێكخراو و سازیێن جودا، ب چاڤدێری و پشته‌ڤانیا به‌رنامێ خوارنا جیهانی (WFP) زانكۆیا پولیته‌كنیكی یا دهۆك پڕۆژه‌یێ پشته‌ڤانیكرنا گه‌نجان ژ بۆ ب ده‌ستڤه‌ئینانا ده‌لیڤێن كاری و ژیانێ ب رێیا ئابوورێ دیجیتالی بۆ 250 گه‌نجان راگه‌هاند.
جارا ئێكێ یه ئه‌ڤ پڕۆژه‌یه ژ لایێ زانكۆیا نافهاتی دهێته به‌رهه‌ڤكرن و مه‌ره‌م ژێ پشته‌ڤانیكرنا گه‌نجێن ئاواره و په‌نابه‌ر و یێن سه‌نته‌رێ پارێزگه‌ها دهۆكێ و زاخۆ یه ژ بۆ پێشئێخستنا شیانێن وان د وارێن (زمانێ ئنگلیزی، زانستێن كۆمپیوته‌ری و ئاڤاكرنا شیانێن كه‌سایه‌تی و كارسازی) دا و بو ماوێ 10 مه‌هان دێ ڤه‌كێشیت، پڕۆژه ب رێژا 50% بۆ په‌نابه‌رێن رۆژئاڤا و 25% بۆ ئاوه‌ره‌یێن شنگالێ و 25% بۆ گه‌نجێن پارێزگه‌هێ یێن ئیدارا سه‌ربخوه یا زاخۆ یه.
ماجد سه‌ید سالح، نوونه‌رێ پارێزگارێ دهۆكێ ده‌ستخوشی ل زانكۆیێ و هه‌ڤكارێن د گه‌ل دا كر و گۆت: “ئه‌م دخوازین رێكخراو و سازیێن جودا ب رۆلێ خوه راببن، هه‌ر چه‌نده حكومه‌تا هه‌رێما كوردستانێ و ئیدارا پارێزگه‌ها دهۆكێ رۆله‌كێ باش گێرایه د ڤه‌حه‌واندنا ئاواره و په‌نابه‌ران دا و په‌یداكرنا ده‌لیڤێن كاری و دابینكرنا پێدڤیێن وان، ئه‌ڤرۆكه ژی ژبلی رێكخراوێن جودا زانكۆیه‌ك ژی ب ڤی رۆلی راببیت و ده‌لیڤێن كاری بۆ ته‌خێن جودا دابین بكه‌ت، له‌و بناڤێ ئیدارا پارێزگه‌هێ ده‌ستخوشیێ لێ دكه‌ین و پشته‌ڤانین بۆ هه‌ر پێدڤیه‌كێ”.
