پارێزگارێ دهۆكێ: دڤێت ماددێ 140 د چارچوڤێ ده‌ستوورێ ئیراقا فیدرال دا بهێته چاسه‌ركرن
ئه‌ڤرۆ:
ب ئاماده‌بوونا د. عه‌لی ته‌ته‌ر، پارێزگارێ دهۆكێ و دژوار فایق، به‌رپرسێ بوردێ مادێ 140 ل جڤاتا وه‌زیرێن هه‌رێما كوردستانێ و چه‌ند په‌رله‌مانتا ر و ره‌وشه‌نبیر و نڤیسه‌ران، دوهی 18/12/ 2022 ل هولا ئێكه‌تیا نڤیسه‌رێن كورد په‌نه‌له‌كێ هه‌ڤپشك ژ لایێ ئێكه‌تیا نڤیسه‌رێن كورد لقێ دهۆكێ و بوردێ مادێ 140 ل جڤاتا وه‌زیرێن هه‌رێما كوردستانێ ب ناڤونیشانێن (مادێ 140 چ لێهات) بۆ (د. محه‌مه‌د ئیحسان) و (د. رائید فه‌همی) هاته سازكرن.
پارێزگارێ دهۆكێ د په‌یڤه‌كێ دا دیار كر، مادێ 140 بابه‌ته‌كێ هه‌ستیار و چاره‌نڤیسازه، دڤێت د چارچوڤێ ده‌ستوورێ ئیراقا فیدرال دا بهێته چاسه‌ركرن.
دیسا دژوار فایق به‌رپرسێ بوردێ مادێ 140 ل جڤاتا وه‌زیران په‌یڤه‌ك پێشكێشكر و تێدا ده‌ستخوشی ل په‌نه‌لیست و هه‌موو لایه‌نان كر و داخوازا سه‌ركه‌فتنێ بۆ كر.
پاشی (د. محه‌مه‌د ئیحسان) و(د. رائید فه‌همی) رۆهنكرن دانه سه‌ر مادێ 140 و ئه‌و كار و ئاسته‌نگێن سالێن به‌ری نوكه كه‌تینه هه‌مبه‌ر بجهئینانا مادێ 140 و به‌رنامێ حكومه‌تا نوو یا ئیراقا فیدرال و نیازێن وان بۆ بجهئینانا مادێ 140 به‌رچاڤكرن .
دیسا هه‌ر دوهی ئێڤاری و د چارچوڤێ به‌رنامێن په‌نه‌لیدا چه‌ند هوزانڤانه‌ك ژ ئاكنجیێن ده‌ڤه‌رێن مادێ 140 ژ هه‌موو ئول و نه‌ته‌وه‌یان هه‌لبه‌ستێن خوه ب زمانێن كوردی و عه‌ره‌بی و سریانی پێشكێش كرن.
