نێچیرڤان بارزانی پیرۆزباهیێ ل میرێ قه‌ته‌ر دكه‌ت
ئه‌ڤرۆ:
سه‌رۆكێ هه‌رێما كوردستانێ، نێچیرڤان بارزانی، پیرۆزباهیێ ل میرێ قه‌ته‌ر و خه‌لكێ وی وه‌لاتی دكه‌ت ل به‌رامبه‌ر مێهڤانكرنا مۆندیالا ته‌پا پێی ب شێوه‌یه‌كێ سه‌ركه‌فتی و دبێژیت، ئه‌ڤ سه‌ركه‌فتنه ب شێوه‌یه‌كی یه كو هه‌ژێ وێ چه‌ندێ یه گه‌لێن ڕۆژهه‌لاتا ناڤین و جیهانێ شانازیێ ب هه‌وه بكه‌ن.
نێچیرڤان بارزانی، سه‌رۆكێ هه‌رێما كوردستانێ كو ئێڤاریا ڕۆژا ئێكشه‌مبی 18 كانوونا ئێكێ 2022 به‌رهه‌ڤی دیتنا یاریا دووماهیا مۆندیالێ د ناڤبه‌را هه‌ردو هه‌لبژارتیێن ئه‌رجه‌نتین و فره‌نسا بووی، دوهی دوشه‌مبی 19 كانوونائێكێ 2022 د پێگه‌هێ خوه یێ تایبه‌ت دا ل سه‌ر تۆرا جڤاكی یا تویته‌ری تویته‌ك به‌لاڤكر و تێدا پیرۆزباهی ل شێخ (ته‌میم بن حه‌مه‌د ئال سانی) میرێ قه‌ته‌ر و گه‌لێ وی وه‌لاتی كر ب هه‌لكه‌فتا سه‌ركه‌فتنا وی وه‌لاتێ قه‌ته‌ر د ڕێكخستن و مێهڤانكرنا مۆندیالا ته‌پا پێی.
سه‌رۆكێ هه‌رێما كوردستانێ سه‌باره‌ت ڤێ چه‌ندێ د تویتا خوه دا دبێژیت” ڕێكخستن و مێهڤانكرنا مۆندیالێ ب وی جۆرێ سه‌ركه‌فتی بڕێڤه‌چوو كو هه‌ژی وێ چه‌ندێ یه گه‌لێن ڕۆژهه‌لاتا ناڤین و جیهانێ، شانازیێ پێ بكه‌ن، دووماهیا خوه‌شیێ ژی ڕۆژا نیشتمانی یا ده‌وله‌تا قه‌ته‌ر بوو. هزار جاران پیرۆزه”.
ژبلی نێچیرڤان بارزانی، سه‌رۆكێ هه‌رێما كوردستانێ، هه‌ر ئێك ژ محه‌مه‌د شیاع سودانی، سه‌رۆك وه‌زیرێن ئیراقێ، محه‌مه‌د حه‌لبووسی، سه‌رۆكێ جڤاتا نوونه‌رێن ئیراقێ و فایق زێدان، سه‌رۆكێ جڤاتا دادوه‌ری ل ئیراقێ، به‌رهه‌ڤی دیتنا یاریا دووماهیا مۆندیالا قه‌ته‌ر یا ته‌پا پێی ببوون.
ده‌قێ په‌یاما نێچیرڤان بارزانی:
پیرۆزباهیێ ل ده‌وله‌تا قه‌ته‌ر و میرێ وێ شێخ ته‌میم بن حه‌مه‌د ئال سانی، میر و برایێن مه ل قه‌ته‌ر دكه‌م ب هه‌لكه‌فتا ڤێ سه‌ركه‌فتنا مه‌زن د میهڤانكرن و ڕێكسختنا قاره‌مانیا مۆندیالا فیفا 2022، ئه‌ڤ سه‌ركه‌فتنه هه‌ژی وێ چه‌ندێ یه گه‌لێن ڕۆژهه‌لاتا ناڤین و جیهانێ شانازیێ پێ بكه‌ن، دووماهیا خوه‌شیێ ژی ڕۆژا نیشتمانی یا ده‌وله‌تا قه‌ته‌ر بوو. هزار جاران پیرۆزه.
