د ترسم ئه‌ز هێلابم
د.ئه‌مجه‌د عوبه‌ید
ب چاڤێن گری ڤه.. رۆندك وه‌كی وان سیلاڤێن ل بن به‌فرێ، ده‌مێ تیرۆژكێن رۆژێ ب هێز هه‌مبێز دكه‌ن، دزێن.. دبارین.. لێڤێن وێ، رٍِاببوونه سه‌ما مرنێ، ئه‌وێ له‌رزینێ ئه‌رزنك و ده‌ستێن وێ ژی داگیر كربوون.
دگۆته هه‌ڤالا خوه: شڤێدی خه‌وێ رێكا چاڤێن من هندا كر بوو، و ئه‌و د چاڤێن من دا دخه‌و چوو بوو، ئه‌وی لێدانێن دلێ من ژێ دزی بوون، ئه‌وی بڕیارا زیندانكرنا هه‌تا هه‌تایێ.. یا روحا من د عه‌شقا خوه دا دابوو، ئه‌و یارێ من بوو.. ئه‌و هه‌ڤالێ دلێ من بوو.. ئه‌و ستێرا گه‌شا شه‌ڤێن من بوو.. ئه‌و لاوێ من بوو.. ئه‌و كوڕێ روحا من بوو.. ئه‌و ئارامی و ئاساییشا من بوو، ئه‌وی ب كه‌نیا خوه، كه‌نیا خه‌مێن من دئینا.
هه‌ر شه‌ڤ دویماهیك نامه‌یا وی ، چاڤێن من كل ددان، شه‌ڤا ته خوه‌شا وی بوو، هه‌رۆ ئێكه‌مین تشتێ ل به‌ر چاڤێن من دكه‌ت سپێده.. (سپێده باش)ا وی بوو، و ئه‌گه‌ر رۆژه‌كێ گیرۆ كربا، ئه‌ز وێ رۆژێ هه‌مییێ یا مفته‌لا و شه‌پرزه بووم.. ژبه‌ر وی ببوومه عاشقا مۆبایلا خوه ژی…!!
– چ لێ هات .. تو هێلایی؟
– دترسم ئه‌ز هێلابم ژ به‌ر ده‌به‌نگییا من.. ئه‌ز ژ عه‌شقێ دترسم گه‌له‌گ ژێ دترسم.. ژ ده‌ربڕینا هه‌ستێن سۆزدارییێ ژی دترسم.. رۆژ بۆ رۆژێ، هه‌ستێن من به‌رانبه‌ر وی دژوار تر لێ دهاتن، دترسیام دین ببم.. یان ب چیایان بكه‌ڤم…!!
– دیاره ته فیلۆفۆبییا یا هه‌یی؟ (هه‌ڤالا وێ گۆتێ).
– ب حێبه‌تی ڤه.. ڤێجا فیلۆفۆبییا چی یه؟
– ئانكو ترسیانه ژ عه‌شقێ.. و ڕه‌ڤینه ژ هه‌ر گرێدانه‌كا ئه‌ڤیندارییێ.
– ئه‌ز نزانم .. لێ یا باش ئه‌ز دزانم، من ب ده‌ستێن خوه.. خوه هاڤێته د دۆزه‌خێ دا.. سه‌برا من ناهێت.. ئه‌ز یا سه‌وداسه‌رم .. نزانم چ بكه‌م.. سه‌رێن رێكا ل من دبه‌رزه‌نه…!
ئه‌ز نوزانم من بۆچ وه‌گۆتێ؟
هه‌ڤالا وێ گولیكا پرچا وێ یا وه‌كی زێری، ل سه‌ر چاڤێن وێ ڕاكر و د دلێ خوه دا دگۆت..(من حه‌یفا ڤان چاڤێن گیایێ بوهارێ، كه‌سكاتییا خوه ژێ دزی.. ببنه سه‌رۆكانییا رۆندكان..)، و گۆتێ ما ته چ كری یه خوه‌لی ب عه‌یشێ؟!!
– وه‌كی ته گۆتی من یا خوه خوه‌لی عه‌یش كری.. شڤێدی من گۆتێ: ئه‌گه‌ر تو هه‌ر وه‌سا یی ل سه‌ر ئاخفتنێن خوه یێن نازك و ئاڤز ژ سۆزدارییێ، یێ به‌رده‌وام بی.. ئێدی نه‌چارم دگه‌لته نه‌مینم.
– ما ته دگه‌ل وی چ دكر؟
– ب تنێ من دڤییا هه‌ڤال بین.
هه‌ڤالا وێ ب گرنژینه‌كا مشت ژ خه‌مێ گۆتێ .. (ئێ و پاش؟)..
– ئێ.. ما من نه گۆته ته.. رۆژ بۆ رۆژێ پێلێن عه‌شقا وی د دلێ من دا بلندتر لێ دهاتن و هند ما بوو من ب خه‌ندقینن..!! ڤێ سپێدێ من مه‌سجا وی نه‌دیتی یه.. ئه‌ڤه بۆ ده‌مژمێر چوارێ ئێڤاری ژی.. من گوه ل ده‌نگێ وی نه‌بوویه.. خودێ ئه‌ز چ بكه‌م؟ مه‌سجه‌كێ بۆ فرێكه‌م.. دترسم به‌رسڤێ نه‌ده‌ت. خوه بێده‌نگ بكه‌م.. ئه‌ز یا د ناڤ خوه دا دكه‌لم.. ئاگره‌كێ د دلێ من دا، كه‌ڤران دبۆهژینیت.
هێشتا زێمارا خوه ب دویماهی نه ئینایی.. زه‌نگێن ژ مۆبایلا وێ هات.. به‌ری ل مۆبایلێ بنێڕیت، پرچا خوه یا ل سه‌ر چاڤێن وێ ب رۆندكان شل بوویی ڕاكر، و د دلێ خوه دا لاڤه ژ خودێ كرن.. یا خودێ یا خودانێ ئه‌رد و ئه‌سمانا.. ب تنێ ئه‌و بیت…!!
