پیرس عەلی هەلبژارتییێ ئیراقێ گەهاندە قووناغا هەشتێ یا كۆپا ئاسیایی
قەیس وەیس
ب سەركێشییا كوڕێ باژێرێ دهۆكێ پیرس عەلی هەلبژارتییێ ئیراق گەهاندە قووناغا هەشتێ ژ قارەمانییا ئاسیا ل سەر ئاستێ پێشكەڤتیان ئەوا هەڤڕكییێن وێ نوكە ل پایتەختێ ئۆزپاكستانێ تەشقەند دهێنە كرن.
د یارییا ئێكێ دا سەرنەكەفتن بەرانبەر هەلبژارتییێ ئیرانێ ب 3-2 گێمان، د یارییا دویێ دا ڤەگەڕیان و ب سەركەفتنێن ل سەر هەلبژارتییێ بەنگلادش ب سێ گێما بێ بەرانبەر ب سەركەڤت، بڤان ئەنجامان پلێتا دەربازبوونێ بۆ قووناغا دویێ مسۆگەر كر، هەروەسان د قووناغا دویێ داش یان ب سەركەڤن ل سەر بەنگلادش ب 3-1 گێمان و دەربازبنە قووناغا 16ێ و هەشتێ، هەلبژارتییێ ئیراقێ پێكهاتینە ژ سێ یاریزانان، پیرس عەلی كاپتن و یاریزانێ سەرەكی، هەروەسان ئەنوەر موەئەید و محەمەد زیاد ل گەل دانە.
لدۆر ڤێ یەكێ پیرس عەلی یاریزانێ ناڤهاتی كەیفخوەشیا خوە دیاركر و گۆت: پێخوەشحالین پێنگاڤا ئێكێ د قووناغا دەستپێكی دا ب سەركەڤتیانە مە دەرباز كر، دووڤدا قووناغا دویێ دا ئەم شیان تیما خوە دەربازبكەینە قووناغا هەشتێ و 16ێ، هەڤڕكیێن بهێز دهێنە كرن و یاریزانێن خودان شیان كو ل سەر ئاستێ نێڤدەولەتی پشكدارن كو ئەڤە ژی پالدەرەكێ سەرەكی بوویە ئەم هەموو شیانێن خوە بۆ دەستڤە ئینانا سەركەڤتنان كار پێ بكەین، هەرچەندە مە ل سەر كیستێ خوە یێ تایبەت پشكداری كریە ژبەركو هیچ میزانیەك بۆ تیما مە نە هاتیە تەرخانكرن، لێ ئەم یێن هاتین بۆ دەستڤە ئینانا دەستكەڤتەكی.
ژلایەكێ دووڤە ناڤهاتی گۆت: وەكو تاكە یاریزانێ كوردستانی پشكدارم لەوما ژی دێ هەموو بزاڤان كەم باشترین شێوە هەڤڕكییێ بكەم، هەرچەندە ب دەستڤە ئینانا ناسناڤێ ئاسیا یا ب سانەهی نینە بەرانبەر یاریزانێن خودان ئەزموون ل جیهانێ، و ناڤودەنگیا خوە ل سەر ئاستێ ئۆلمپیاد و قارەمانیێن نێڤدەولەتی هەنە، لێ د یارییا تێنسا ل سەر مێزێ شارەزاهی، سەبر و هەڤڕكییا بەردەوام دڤێت، ئەوا د شیانێن مە دا دێ مەزێخین بۆ هندێ ب دەستكەفتەكێ مەزن یان ڕێزبەندیەكا دیرۆكی ڤەگەڕین.
